საქართველო, შესაძლოა, რუსეთის მეგობრული ტურისტული ქვეყნების სიას დაემატოს, - ამის შესახებ ინფორმაციას რუსული მედია ავრცელებს.

რუსეთის სახელმწიფო დუმაში კანონპროექტი შევიდა, რომელიც „დსთ“-ს რიგი სახელმწიფოების მიმართულებებით მომუშავე ტუროპერატორებისთვის ფინანსური წახალისების შემოღებას ითვალისწინებს.

ტურისტული პორტალები TourDom.ru და Profi.Travel ირწმუნებიან, რომ მეგობრული ქვეყნების სია რუსეთის ეკონომიკური განვითარების სამინისტროსთან უკვე შეთანხმებულია და მასში „დსთ“-ს წევრ ქვეყნებთან ერთად საქართველოც შედის. ასევე, აფხაზეთისა და „სამხრეთ ოსეთის“ თვითგამოცხადებული რესპუბლიკები.

ადგილობრივი მედიის ცნობით, მეგობრული ტურისტული ქვეყნების სიას რუსეთის მთავრობა დაამტკიცებს.

სავარაუდოდ, კანონი ძალაში 2024 წლის 1-ელ აპრილს შევა.