ბოლო წლების განმავლობაში ქვეყანაში მიმდინარე პოზიტიური ეკონომიკური ტენდენციები აისახება მოსახლეობის ხელფასების ზრდაზე - მიმდინარე წლის მესამე კვარტლის მაჩვენებლებით, მნიშვნელოვნად არის გაზრდილი დაქირავებით დასაქმებულთა შრომის ანაზღაურება, რომელიც 16% ს აჭარბებს და 1855 ლარს შეადგენს, ასევე რეალურ გამოხატულებაში გვაქვს დაახლოებით 15.6 % იანი ზრდა, რაც, ფაქტობრივად, ინფლაციის გამორიცხვით, საშუალოდ ხელფასის ზრდას ნიშნავს, - ამის შესახებ ეკონომიკის მინისტრის მოადგილემ, ვახტანგ ცინცაძემ „საქსტატის“ მიერ გამოქვეყნებული მონაცემების შეფასებისას განაცხადა.

ვახტანგ ცინცაძის თქმით, ხელფასების ზრდა ფიქსირდება ეკონომიკის თითქმის ყველა სექტორში.

„მნიშვნელოვანი ზრდა ფიქსირდება მშენებლობის, ინფორმაციის და კომუნიკაციების, საფინანსო და სადაზღვევო სექტორში და ეს ჩამონათვალი საკმაოდ დიდია. ჩვენი მოლოდინია, რომ ქვეყანაში პოზიტიური ეკონომიკური ტენდენციები მომავალ წლებშიც გაგრძელდება, რაც თავისთავად აისახება როგორც ხელფასების ზრდაზე, ასევე მოსახლეობის მსყიდველუნარიანობაზე“, - აღნიშნა ეკონომიკის მინისტრის მოადგილემ.

როგორც ეკონომიკისა და მდგრადი განვითარების სამინისტროს მიერ გავრცელებულ ინფორმაციაშია ნათქვამი, საქართველოს სტატისტიკის ეროვნული სამსახურის ინფორმაციით, 2023 წლის მესამე კვარტალში, დაქირავებით დასაქმებულთა საშუალო თვიური ნომინალური ხელფასი, 2022 წლის ანალოგიურ პერიოდთან შედარებით 16.3 პროცენტით (260.4 ლარით) გაიზარდა და 1,855.4 ლარი შეადგინა. მესამე კვარტალში დაქირავებით დასაქმებულთა რეალური საშუალო თვიური ხელფასი, წინა წლის მაჩვენებელთან შედარებით, 15.6%-ით არის გაზრდილი.

ხელფასების ზრდა დაფიქსირდა როგორც ბიზნეს, ასევე არასამეწარმეო და საფინანსო სფეროში. ბიზნესსექტორში დასაქმებულების ხელფასი, 2023 წლის მესამე კვარტალში, წინა წლის შესაბამის პერიოდთან შედარებით, 17.1%-ით გაიზარდა, ხოლო არასამეწარმეო და საფინანსო სფეროში დასაქმებულების ხელფასი 14.4%-ით არის გაზრდილი.