უკრაინის უშიშროებისა და თავდაცვის საბჭოს მდივნის, ოლექსი დანილოვის განცხადებით, მარინკაში კიდევ უფრო უარესი ვითარებაა, ვიდრე ბახმუტში იყო.

„იქ ბახმუტთან შედარებით კიდევ უარესი მდგომარეობაა რელიეფის გამო. ამიტომ, კიდევ ერთხელ ხაზს ვუსვამ, რომ მარინკას ტერიტორიაზე ფაქტობრივად არ არსებობს შენობები, რომლებიც გადარჩა. დასახლების მცირე ნაწილი კვლავ უკრაინის შეიარაღებული ძალების კონტროლის ქვეშაა, მაგრამ რუსებს სურთ, დასახლება მთლიანად დაიკავონ. თუმცა, თუ ყველაფერს თავის სახელს დავარქმევთ, სურთ, დაიპყრონ ის, რაც დასახლებიდან დარჩა, რადგან მათ ფაქტობრივად მთლიანად გაანადგურეს“, - აღნიშნა დანილოვმა.

შეგახსენებთ, რუსეთის თავდაცვის მინისტრმა, სერგეი შოიგუმ ორი დღის წინ განაცხადა, რომ რუსული ძალები მარინკას აკონტროლებენ. უკრაინის თავდაცვის ძალებში ეს ინფორმაცია უარყვეს და განაცხადეს, რომ მარინკასთვის ბრძოლა გრძელდება.