„ჰამასის“ დელეგაცია ღაზაში ცეცხლის შეწყვეტის მისაღწევად გზების განსახილველად მოსკოვში ჩავიდა, - ამის შესახებ განცხადებას ტერორისტული ორგანიზაცია თავის „ტელეგრამ“ არხზე ავრცელებს.

დელეგაცია, რომელსაც „ჰამასის“ საერთაშორისო კავშირების ბიუროს ხელმძღვანელი, მუსა აბუ მარზუკი ხელმძღვანელობდა, მოსკოვში რუსეთის საგარეო საქმეთა მინისტრის მოადგილეს, მიხაილ ბოგდანოვს შეხვდა.

„პოლიტიკური კონსულტაციების დროს განიხილებოდა ღაზის სექტორში ცეცხლის შეწყვეტის მიღწევის გზები იმასთან ერთად, რომ პალესტინელი ერის წინააღმდეგ აგრესია შეწყდეს. ახსნილ იქნა „ჰამასის“ მოძრაობის პოზიცია მძევლებთან დაკავშირებით, რომლებიც წინააღმდეგობის რაზმებს ჰყავთ“, - ნათქვამია „ჰამასის“ განცხადებაში.

განცხადების თანახმად, „ჰამასი“ „ძალიან აფასებს რუსეთის დიპლომატიურ ძალისხმევებს”.