რუსეთის მხრიდან ფინეთისთვის არანაირი უშუალო საფრთხე არ არსებობს, - ამის შესახებ ფინეთის პრემიერ-მინისტრმა პეტერი ორპომ სტოკჰოლმში ვიზიტისას გამართულ პრესკონფერენციაზე განაცხადა.

გამოსვლისას ორპომ შვედეთის შეიარაღებული ძალების უმაღლესი მეთაურის მიკაელ ბიუდენის განცხადება გაიხსენა, რომელმაც აღნიშნა, რომ შვედეთზე რუსეთის თავდასხმა შესაძლებელია.

„რუსეთის მხრიდან ფინეთისთვის არანაირი უშუალო საფრთხე არ არსებობს. შეგვიძლია მშვიდად გვეძინოს“,-განაცხადა ორპომ.

კითხვაზე, სჭირდებათ თუ არა ფინელებს „ომისთვის მორალურად მზადება“, ფინეთის პრემიერ-მინისტრმა უპასუხა „არა“.

„ფინეთისთვის ვითარება სტაბილურია. ფინეთი, ასე ვთქვათ, ყოველთვის მზად იყო საფრთხეებისთვის საბჭოთა კავშირის მხრიდან ან, როგორც ახლა, რუსეთის მხრიდან. ყოველთვის მზად ვიყავით ამისთვის, და ეს, ასე ვთქვათ, ჩვენი საზოგადოების ნაწილი იყო”,-განაცხადა ოპრომ.

მან აღნიშნა, რომ ფინეთის ნატოში წევრობა “ძლიერი მუხრუჭი” გახდება საზღვარზე რუსეთის აგრესიისთვის.

„ფინელებს მწვავედ არაფრის არ უნდა ეშინოდეთ. მაგრამ, ამავდროულად, უნდა ვთქვათ და ვაღიაროთ, რომ რუსეთი შეიცვალა: უფრო აგრესიულად მოქმედებს - მის საზღვარზე სხვა სახელმწიფოს დაესხა თავს, ომობს იქ მსხვერპლზე ზრუნვის გარეშე. არც სხვა მხარეს, არც საკუთარზე. ამიტომ ფინეთმა, რა თქმა უნდა, ეს რეალობა უნდა აღიაროს, მაგრამ ამის გამო ძილის დაკარგვა არაა საჭირო“,-განაცხადა ორპომ.