მმართველი პარტიის გადაწყვეტილებით, წარმატებული, კომპეტენტური, გამოცდილი დირექტორი გაირიყა და სისტემამ დასაჯა, რადგან ჩათვალა, რომ საარჩევნო ყულაბის შემვსებლად დოდო ჭოტორლიშვილი არ გამოადგებოდათ, - ასე გამოეხმაურა „სტრატეგია აღმაშენებლის“ განათლების მიმართულების ხელმძღვანელი, ნანა ტოხვაძე სკოლიდან დირექტორის გაშვების ფაქტს.

მისი თქმით, აღნიშნულ საკითხზე სახალხო დამცველმა დისკრიმინაციის ფაქტი უკვე დაადგინა, თუმცა საქმის განხილვა მცხეთის რაიონულ სასამართლოში მე-4 წელია გრძელდება, სკოლას კი დირექტორი ისევ არ ჰყავ.

„დღეს, მცხეთის რაიონულ სასამართლოში გაიმართა მორიგი სხდომა. პროცესი მე-4 წელია მიმდინარეობს. სასამართლო დავა დაწყებულია სკოლის ყოფილი დირექტორის, დოდო ჭოტორლიშვილის სარჩელის საფუძველზე, რომელიც სისტემას პოლიტიკური ნიშნით გათავისუფლებას ედავება.

ხაზგასასმელია, რომ მის მიმართ დისკრიმინაციის ფაქტი დაადგინა სახალხო დამცველმა. რაც ყველაზე სამწუხაროა, სკოლას, რომელსაც დოდო ჭოტორლიშვილი ხელმძღვანელობდა, დღემდე არ ჰყავს დირექტორი.

მმართველი პარტიის გადაწყვეტილებით, წარმატებული, კომპეტენტური, გამოცდილი დირექტორი გაირიყა და სისტემამ დასაჯა, რადგან ჩათვალა, რომ საარჩევნო ყულაბის შემვსებად ქალბატონი დოდო არ გამოადგებოდათ და აბა, ბავშვების განათლება და ბედი ვის ადარდებს?! უნდა აღინიშნოს, რომ დოდო ჭოტორლიშვილი ერთადერთი კანდიდატი გახლდათ ზაფხულში გამართულ დირექტორთა კონკურსზე, რომელიც კვლავ "დაიწუნეს", როგორც სუს-ისგან პოლიტიკურად არალოიალობით დახასიათებული დირექტორი.“ - განაცხადა ტოხვაძემ.

ნანა ტოხვაძის განცხადებას „სტრატეგია აღმაშენებელი“ ავრცელებს.