ოკუპირებული აფხაზეთის ე.წ. პრეზიდენტმა, ასლან ბჟანიამ ე.წ. პარლამენტში “უცხო აგენტების შესახებ” კანონპროექტი შეიტანა.

შესაბამისი ტექსტი ოკუპირებული აფხაზეთის ე.წ. პრეზიდენტის ვებგვერდზე გამოქვეყნებული.

კანონპროექტის სრული სახელია “არაკომერციული ორგანიზაციებისა და ფიზიკური პირების შესახებ, რომელიც უცხო აგენტის ფუნქციას ასრულებენ”.

“კანონპროექტის მიღება ხელს შეუწყობს აფხაზეთის რესპუბლიკის ინტერესების დაცვასა და უსაფრთხოების, მისი სუვერენიტეტის, მოქალაქეების უფლებებისა და თავისუფლებების უზრუნველყოფას, და ასევე აფხაზური სახელმწიფოსა და საზოგადოების პოლიტიკურ საქმიანობაში უცხოურ ჩარევაზე დაუყოვნებლივი რეაგირების უზრუნველყოფას”, - ნათქვამია კანონპროექტის განმარტების ნაწილში.

კანონპროექტის თანახმად, უცხო აგენტებად შეიძლება აღიარებული იყოს როგორც არაკომერციული ორგანიზაციები, ასევე, ფიზიკური პირები.

“აფხაზეთის რესპუბლიკის მოქალაქეები, უცხოეთის მოქალაქეები და მოქალაქეობის არმქონე პირები შესაძლოა აღიარებულ იქნან ფიზიკურ პირებად, რომლებიც უცხო აგენტის ფუნქციებს ასრულებენ, თუ ისინი ფულად სახსრებს და (ან) სხვა საკუთრებას იღებენ საზღვარგარეთ წყაროებიდან”, - ნათქვამია ტექსტში.

ამავდროულად, სახელმწიფოებისგან, რომლებმაც ოკუპირებული აფხაზეთის დამოუკიდებლობა აღიარეს (რუსეთი, ვენესუელა, სირია, ნიკარაგუ, ნაურუ), ან ამ სახელმწიფოებში დარეგისტრირებული მოქალაქეებისგან ან იურიდიული პირებისგან ფულადი სახსრების მიღება არ ჩაითვლება არაკომერციული ორგანიზაციის ან ფიზიკური პირის “უცხო აგენტად” აღიარების საბაბად.