ღარიბაშვილს სამი კვირის წინ ტაშს უკრავდნენ საქართველოს პარლამენტში, დღეს კი ლამის კორუფციის მთავარ მამამთავრად გამოაცხადონ, მაგრამ ამასაც ვერ ბედავენ იმიტომ, რომ ამ საკითხზე ივანიშვილს მათთვის კურთხევა არ მიუცია, - ამის შესახებ „სტრატეგია აღმაშენებლის“ დეპუტატმა, პაატა მანჯგალაძემ ჟურნალისტებთან საუბრისას განაცხადა.

მისივე თქმით, კორუფცია ხელისუფლების მაღალჩინოსნების მონაწილეობის გარეშე არ არსებობს.

„როდესაც „ქართული ოცნება“ ამბობს, „კორუფციას ვებრძვით“, ირიბად და პირდაპირ აღიარებს, რომ „დიახ, „ქართულ ოცნებაში“ არსებობენ მინისტრები, პრემიერ-მინისტრები, რომლებიც ინაწილებდნენ ხალხის ქონებას საკუთარი ინტერებისთვის”, - აღნიშნა მანჯგალაძემ.

მან ასევე ევროკავშირის დათქმებზე ისაუბრა და განაცხადა, რომ სახეზე გვაქვს ჩავარდნისთვის განწირული რეკომენდაციები, რომელთა შესრულებასაც „ქართული ოცნება“ არ აპირებს.

„ქართული ოცნება“ ქმნის იმიტაციას, თითქოს რაღაცას აკეთებს, მაგრამ ჩვენ მათი საჯარო განცხადებებიდან ვიცით, რომ ამას არ აპირებენ. მათთვის მთავარი არ არის სამართლიანი არჩევნები, არც ის, რაც საქართველოს მოქალაქეს აწუხებს, არც ის, რომ მოგვარდეს პრობლემები, რომლებიც დაკავშირებულია საქართველოს ევროპასთან ინტეგრაციასთან. მათი ამოცანაა სკამის შენარჩუნება. „ქართულ ოცნებას“ გარდა იმისა, რომ ძარცვოს ხალხი და შეინარჩუნოს სკამი, სხვა ამოცანა არ აქვს, მაშინ როდესაც ჩვენ ყოველ დღე ვთავაზობთ, რომ გავხსნათ დისკუსია ეკონომიკაზე სამუშაო ადგილებზე და იმ პრობლემებზე, რაც ხალხს აწუხებს”, - განაცხადა მანჯგალაძემ.