10-წლიან ჭრილში ქვეყანა მსოფლიოში ათეულში მოხვდა დემოკრატიზაციის თვალსაზრისით - დიახ, მოსახლეობის უმრავლესობა მხარს უჭერს „ქართულ ოცნებას“, ალტერნატივა კი არის წამება, გაუპატიურება, საშინელება, სიკვდილი და ომი,- ამის შესახებ „ქართული ოცნების“ თავმჯდომარე ირაკლი ღარიბაშვილმა პრესკონფერენციაზე განაცხადა.

მისი თქმით, ხელისუფლება არ დაუშვებს, რომ „ქვეყნის მოღალატეებმა და მტრებმა არ ქვეყანა მეორედ დაანგრიონ“ „ქართულმა ოცნებამ“ და ბიძინა ივანიშვილის ხელისუფლებამ ქვეყანას მოუტანა მშვიდობა, სტაბილურობა, ეკონომიკური განვითარება კეთილდღეობა, ევროკავშირის კანდიდატის სტატუსი და რეალური დემოკრატია.

„დემოკრატიზაციის თვალსაზრისით ქვეყანამ საოცარი ტრანსფორმაცია განიცადა. 10-წლიან ჭრილში ქვეყანა მსოფლიოში ათეულში მოხვდა დემოკრატიზაციის თვალსაზრისით და რატომ არ უნდა გვქონდეს ამაზე საუბარი ჩვენს ხალხთან? გგონიათ, რომ ერთია ჩვენ რას ვამბობთ და ხალხმა ეს არ იცის, გვიჯერებს რასაც ვამბობთ? ხალხმა ეს ყველაფერი ნახა, დაიჯერა და ამიტომ მიჰყვება უმრავლესობა. დიახ, მოსახლეობის უმრავლესობა მხარს უჭერს „ქართულ ოცნებას“. რა აქვს მეორე ალტერნატივა ამომრჩეველს? - ალტერნატივაა წამება, გაუპატიურება, საშინელება, სიკვდილი და ომი. ამას გვთავაზობს „ნაციონალური მოძრაობა“ და სამწუხაროდ, ყველა პარტია, მათ შორის დაშლილი, დაქსაქსული პარტიები მიწებებულები არიან ამ პარტიაზე. ყველა მათ თამაშს თამაშობს, სხვა თამაში არ არსებობს. არსებობს ერთი ხელისუფლების ალტერნატივა, რომელიც არის მშვიდობა, სტაბილურობა, განვითარება და კეთილდღეობა. მეორე მხარეს არის უბედურება. დაგავიწყდათ, ორი წლის წინ რა დღეში იყვნენ? მათი მიზანი იყო „მეორე ფრონტის“ გახსნა, უკრაინიზაცია, ქვეყნის განადგურება. ამას არ დავუშვებთ. ამ ქვეყნის მოღალატეებსა და მტრებს არ მივცემთ საშუალებას, ქვეყანა მეორედ დაანგრიონ“,- განაცხადა ირაკლი ღარიბაშვილმა.