ყველამ ვიცით, რომ საქართველო ევროპული ოჯახის ნაწილია, - ამის შესახებ სამეზობლო პოლიტიკისა და გაფართოების საკითხებში ევროკომისარმა, ოლივერ ვარჰეიმ საქართველო-ევროკავშირის ასოცირების საბჭოს შეხვედრის შემდეგ გამართულ პრესკონფერენციაზე განაცხადა.

„შეხვედრაზე, პირველი ორი სფერო აღვნიშნე, სადაც საქართველოს ღია შესაძლებლობები აქვს და პროგრესს უკვე მივაღწიეთ. ეს როუმინგი და ევროპის პირველი ანგარიშსწორების მექანიზმებია. როუმინგი ის სფეროა, სადაც დავინახეთ, თუ რამდენად სწრაფად იმოქმედა საქართველოს მთავრობამ და ამ დროისთვის ჩვენ ყველაფერი გვაქვს, რათა საბჭოს წინადადება წარვუდგინოთ და საქართველოს ევროპულ როუმინგში სწრაფად ჩართვა მოხდეს. ამის შედეგად, როუმინგის ხარჯები მნიშვნელოვნად შემცირდება, როგორც ქართველი ტურისტებისთვის, ისე ევროპაში მომუშავე და მცხოვრები ქართველებისთვის. ეს საეტაპო ცვლილება, ვიზალიბერალიზაციის შემდეგ, საქართველოს მოსახლეობისთვის, შესამჩნევი და ხელშესახები იქნება“, - განაცხადა ოლივერ ვარჰეიმ.

„მეორე სფერო, რომელზეც ჩვენ ვმუშაობთ, ევროპული ანგარიშსწორების სისტემაა, სადაც ვხედავთ, რომ ჯერ კიდევ უნდა შევასრულოთ ამოცანები, მაგრამ ჩვენ უკვე მზად ვართ, მაშინ, როდესაც საქართველო იქნება მზად. საქმე ეხება, საკანონმდებლო ნორმების დახვეწას, საბანკო სექტორში წესების დანერგვას, რათა ერთიან ევროპულ საანგარიშსწორებო სისტემაზე გადასვლა შევძლოთ. ასე რომ, როგორც ყველამ ვიცით, საქართველო ჩვენი ევროპული ოჯახის ნაწილია და ევროპული საბჭოს გადაწყვეტილებიდან, სულ რაღაც ორი თვის შემდეგ, უფრო მაღალ დონეზე უფრო მაღალი სიჩქარით გადავდივართ“, - აღნიშნა ოლივერ ვარჰეიმ.