საქართველოს ბიზნეს ასოციაციის წევრმა ქართული ავიაკომპანია Geosky-ს სამგზავრო მიმართულებამ Georgian Wings-მა თბილისის შოთა რუსთაველის სახელობის საერთაშორისო აეროპორტიდან მოლდოვას, კიშინაუს საერთაშორისო აეროპორტის მიმართულებით პირველი, რეგულარული ფრენა შეასრულა. ამის შესახებ ინფორმაციას საქართველოს ბიზნეს ასოციაცია ავრცელებს.

მათივე ცნობით, პირველი რეგულარული ფრენისადმი მიძღვნილი ღონისძიება, კიშინაუს საერთაშორისო აეროპორტში საზეიმო ვითარებაში წარიმართა.

საქართველოს ბიზნეს ასოციაციის განმარტებით, ღონისძიებას როგორც Georgian Wings-ის ხელმძღვანელი, ასევე საქართველოს საგანგებო და სრულუფლებიანი ელჩი მოლდოვას რესპუბლიკაში ლევან დიასამიძე, კიშინაუს საერთაშორისო აეროპორტის და Georgian Wings-ის პარტნიორი კომპანიების წარმომადგენლები ესწრებოდნენ.

Georgian Wings-ის პრეზიდენტის შალვა კიკნაძის განცხადებით, „ავიაკომპანია Geosky-ს სამგზავრო მიმართულება Georgian Wings-ი იწყებს ახალ მიმართულებას თბილისი-კიშინაუ-თბილისი კვირაში 2 სიხშირით. მისივე თქმით, გადაწყვეტილება კიშინაუს მიმართულებით ფრენების დაწყების თაობაზე, გაზრდილი მოთხოვნიდან გამომდინარე იქნა მიღებული. როგორც შალვა კიკნაძემ განაცხადა, აღნიშნული ფრენა უფრო დააახლოებს საქართველოსა და მოლდოვას და ხელს შეუწყობს ორ ქვეყანას შორის ტურიზმის ზრდას.

„ვულოცავთ ჩვენს წევრ კომპანია „Georgian Wings”-ს ახალ ფრენას კიშინაუს მიმართულებით, რაც მნიშვნელოვანია, როგორც ბიზნესის განვითარებისა და ოპერირების არეალის გაფართოების, ასევე ქვეყნებს შორის ტურისტული პოტენციალის ზრდის თვალსაზრისით. ვფიქრობ, მსგავსი სიახლეები პოზიტიურად აისახება ჩვენი ქვეყნის ეკონომიკაზე“,- განაცხადა საქართველოს ბიზნეს ასოციაციის აღმასრულებელმა დირექტორმა ლევან ვეფხვაძემ.

საქართველოს ბიზნეს ასოციაციის ინფორმაციით, Georgian Wings-ი დღეიდან ფრენებს თბილისი-კიშინაუ-თბილისის მიმართულებით, ყოველ სამშაბთს და შაბათ დღეს, რეგულარულად კვირაში 2 სიხშირით შეასრულებს.

ავიაბილეთების შეძენა შესაძლებელია როგორც ავიაკომპანიის ოფიციალურ ვებ.გვერდის მეშვეობით georgianwings.com, ასევე ავია სალაროებსა და ტურისტულ კომპანიებში.