ჯამში ოპოზიციური განწყობები მეტია, ვიდრე სახელისუფლებო, მაგრამ იმის გამო, რომ გამარჯვების კონფიგურაცია არ დგება, ეს იწვევს პირველ რიგში ამომრჩევლის ფრუსტრაციას და იმედგაცრუებას, რომ არაფერი არ შეიცვლება, - ამის შესახებ „საქართველოს ევროპული ორბიტის“ ხელმძღვანელმა, ნინო ლომჯარიამ განაცხადა.

როგორც მან „პალიტრანიუსის“ გადაცემა „360 გრადუსში“ განაცხადა, ამომრჩეველს ბიულეტენში ბევრი არჩევანი არ უნდა დახვდეს, რადგან ეს ოპოზიციურ ხმებს გაფანტავს.

„რაღაც ტიპის დაჯგუფებით უნდა დასრულდეს პოლიტიკურ სპექტრში შექმნილი გაუგებრობა. პირდაპირ ვერავის ვერ ვეტყვი ვინ სად წავიდეს, ეს არ არის ჩემი საქმე, მაგრამ ჩაატარონ კვლევები, შეხედონ ამ სურათს ამომრჩევლის თვალით. უკვე მალე უნდა იყოს მიღებული გადაწყვეტილებები იმიტომ, რომ ბევრი დრო არ დარჩა და ამომრჩეველს ბიულეტენში არ უნდა დახვდეს ბევრი არჩევანი იმიტომ, რომ ეს ხმებს გაფანტავს“, - განაცხადა ნინო ლომჯარიამ.

ნინო ლომჯარიას თქმით, არჩევნებამდე ძალიან ცოტა დროა დარჩენილი და ოპოზიციური პოლიტიკური ცენტრების გამსხვილების ნაცვლად ახალი პარტიების შექმნას არ უნდა ვხედავდეთ.

„8 თვეა დარჩენილი არჩევნებამდე და რატომღაც მეც მეგონა და ალბათ, ბევრი ფიქრობდა, რომ იმდენად ცხადი და ნათელია, რა შეიძლება იყოს გამარჯვების კონფიგურაცია და იმდენად ლოგიკურია, რომ რა უნდა მომხდარიყო, რომ მე მეგონა, ეს პროცესი გაცილებით ადრე დაიწყებოდა და დასრულდებოდა. რეალურად ძალიან ცოტა დროა დარჩენილი არჩევნებამდე და ჩვენ არა თუ გამსხვილებას ვხედავთ ოპოზიციური პოლიტიკური ცენტრების, არამედ იქმნება ახალი პარტიები. უკვე არსებულებიდან ყველა აცხადებს, რომ თვითონ არიან განსაკუთრებულები, უნიკალურები, რომ ცალკე უნდა გავიდნენ არჩევნებზე. ეს ყველაფერი მიდის იმისკენ, რაც არის ყველაზე ცუდი სცენარი. იმ შემთხვევაში, თუ მათ უნდათ არჩევნებში გამარჯვება, თუ უნდათ მმართველი პოლიტიკური ძალის დამარცხება, რომელიც უკვე 12 წელია ერთპარტიულად მართავს ამ ქვეყანას და კიდევ 16 წელი უნდა, მე ვფიქრობ, რომ დროა, ვისაც გვაწუხებს ეს მდგომარეობა, ვინც გულშემატკივარია ამ ქვეყანაში მრავალპარტიული, კოალიციური მმართველობის, ვისაც უნდა დამოუკიდებელი ინსტიტუტები, სამართლიანი არჩევნები და ა.შ. ხმამაღლა უნდა დავიწყოთ ამაზე საუბარი. ველოდებით, ვუყურებთ ვინ რას გადაწყვეტს და პროცესები ისე მიდის, რომ საკუთარი ეგოები, ამბიციები სძალავს და თითქოს ერთმანეთს ეჯიბრებიან, ვინ გადალახავს 5%-იან ბარიერს. ეს არ უნდა იყოს არცერთი პარტიის თვითმიზანი“, - განაცხადა ნინო ლომჯარიამ.