მარნეულის მუნიციპალიტეტში სოფლის მხარდაჭერის პროგრამის ფარგლებში მოსახლეობასთან შეხვედრები დასრულდა.

მარნეულის მერიის ინფორმაციით, პროექტების შერჩევის მიზნით, მოსახლეობასთან შეხვედრები მუნიციპალიტეტის 17 ადმინისტრაციული ერთეულის 77 სოფელში, მერის, კენან ომაროვის ბრძანების საფუძველზე შექმნილმა სამუშაო ჯგუფებმა გამართეს.

მათივე ცნობით, კრებებზე ადგილობრივმა მოსახლეობამ აირჩია, აღნიშნული პროგრამით თუ რა ტიპის ინფრასტრუქტურული პროექტი განხორციელდება მათ სოფლებში.

„აღსანიშნავია, რომ 2024 წელს მარნეულის მუნიციპალიტეტში სოფლის მხარდაჭერის პროგრამისთვის, საქართველოს რეგიონებში განსახორციელებელი პროექტების ფონდიდან 1 232 000 ლარია გამოყოფილი“, - ნათქვამია ინფორმაციაში.