საქართველოს ბიზნესასოციაციის მიერ ორგანიზებულ კონფერენციას: „საქართველოს ეკონომიკისა და სწრაფად მზარდი სექტორების პერსპექტივები“, საქართველოს პრემიერ-მინისტრი ირაკლი კობახიძე და მთავრობის წევრები დაესწრებიან.

როგორც ბიზნესასოციაციის მიერ გავრცელებულ ინფორმაციაშია ნათქვამი, კონფერენციის ფარგლებში, საქართველოს ბიზნესასოციაციის პრეზიდენტი სოსო ფხაკაძე პრემიერ-მინისტრს, მთავრობის წევრებსა და ბიზნეს საზოგადოებას 2019-2023 წლების ინდექსის დინამიკას გააცნობს, რის საფუძველზეც შეფასდება ბიზნესის განწყობები და მოლოდინები.

„კონფერენციის მსვლელობისას Galt&Taggart-ის სპეციალისტები მაკროეკონომიკურ მაჩვენებლებსა და ეკონომიკის სექტორებს მიმოიხილავენ.

კონფერენციის ფარგლებში, ასევე, გაიმართება ორი პანელური დისკუსია: პირველი, მაკროეკონომიკური მდგომარეობა და პერსპექტივები და მეორე, სექტორული მიმოხილვა, სადაც საუბარი შეეხება ტრანსპორტსა და ლოგისტიკას, ტურიზმს, საცხოვრებელ უძრავ ქონებას, ასევე FMCG-ის, ინფორმაციულ ტექნოლოგიებსა და განათლების სექტორებს. პანელურ დისკუსიებში მონაწილეობას მიიღებენ როგორც მთავრობის, ასევე ბიზნესის წარმომადგენლები“,- ნათქვამია ინფორმაციაში.