ჩვენს ქვეყანას მწვალებლებთან, „ნაცებთან“, „ნეონაცებთან“ და აი, ამ წარმომადგენლობებთან კოალიციური მმართველობა არ ემუქრება - ერთმანეთში ვაჭრობენ, ვინ როგორ გარიგდეს, - ამის შესახებ საპარლამენტო უმრავლესობის დეპუტატმა, ირაკლი ზარქუამ ჟურნალისტებთან საუბრისას განაცხადა.

მისივე თქმით, ოპოზიციას ერთმანეთში კონკურენცია აქვს გამოცხადებული და 20%-იან მხარდაჭერაზე ნადირობენ.

როგორც ზარქუა აღნიშნავს, „ქართული ოცნება“ არჩევნების შედეგად საკონსტიტუციო უმრავლესობას მოიპოვებს.

„მგონია, რომ საერთოდ კოალიციურ მმართველობაზე საუბარი, რომელიც მათ შორის პრეზიდენტმა წამოიწყო, რომელიც არის რადიკალების პრეზიდენტი, ამ ხელმოცარულების და რადიკალურების ერთგვარი მესიჯბოქსია, რომ საზოგადოება დაარწმუნონ, რომ აი, კოალიციური მთავრობა მოდის. სიცრუეა ეს, ტყუილია. ყველა კვლევაში ცალსახად წერია, რომ დიახ, "ქართულ ოცნებას" აქვს მყარი უმრავლესობის მონაცემები ისე, რომ ჯერ არც დაგვიწყია წინასაარჩევნო კამპანია. ჩვენს ქვეყანას არ ემუქრება მწვალებლებთან, "ნაცებთან", "ნეონაცებთან" და აი, ამ წარმომადგენლობებთან კოალიციური მმართველობა. ეს ტყუილია, შეცდომაში არავინ შეგიყვანოთ. მათ ახლა უბრალოდ კონკურენცია აქვთ გამოცხადებული ერთმანეთში, ვერ ჩამოყალიბდნენ, სია როგორ გააკეთონ. იყო მცდელობა, რომ ერთიანი ბაზა შეექმნათ სიების, მაგრამ ყველა ამბიციურია. ყველას რომ ჰკითხო, გადამრჩენელია ამ ქვეყნის, დაწყებული „მუსტანგერების“ მიმდევრებით, გაგრძელებული "ნეონაცებით", ანუ მელია, გვარამია და ა.შ. და კიდევ ჩახდილები, რომელიც არის გიჟი ჯაფარიძე და მისი „პადრუშკა“ ხოშტარია, რომლის ოჯახიც დღემდე რუსეთიდან ფინანსდება,“ - განაცხადა ზარქუამ.