რუსული დაზვერვა ევროკავშირის ინსტიტუტებში შეღწევისა და უკრაინაში მისი შეჭრის შესახებ კრემლის მხარდამჭერი საუბრის გასავრცელებლად სერბ აგენტს იყენებს.

ამის შესახებ ინფორმაციას POLITICO დასავლეთის დაზვერვის დოკუმენტზე დაყრდნობით ავრცელებს.

დოკუმენტის თანახმად, ჯერ კიდევ 2023 წლის ოქტომბერში, სერბმა ნოვიცა ანტიჩმა, აქტიური „გავლენის აგენტმა“, რომელიც შეგნებულად მჭიდროდ თანამშრომლობდა რუსეთის უშიშროების უწყებასთან, შეხვედრები გამართა ევროპელ ოფიციალურ პირებთან, კერძოდ, ევროპარლამენტის წევრებთან, მათ შორის გერმანელ დეპუტატ ვიოლა ფონ კრამონთან, იტალიელ ალესანდრა მორეტისთან და სლოვაკ ვლადიმერ ბილჩიკთან. დოკუმენტში არაფერია ნათქვამი იმის შესახებ, რომ აღნიშნულმა ევროპარლამენტარებმა იცოდნენ ანტიჩის „ეფ-ეს-ბე“-სთან კავშირების შესახებ, როდესაც მას შეხვდნენ.

ამასთან, ანტიჩი, რომელიც სერბეთის სამხედრო სავაჭრო კავშირის თავმჯდომარეა, ასევე შეხვდა EUROMIL-ისა და EPSU-ს პროფკავშირების წარმომადგენლებს, რომლებიც წარმოადგენენ შეიარაღებული ძალების პერსონალს და საჯარო სამსახურების თანამშრომლებს ევროკავშირში.

იმ დოკუმენტის თანახმად, რომლის შინაარსიც POLITICO-სთვის ცნობილი გახდა, ანტიჩი არის რუსეთის უშიშროების ფედერალური სამსახურის აქტიური „გავლენის აგენტი“. ის თანამშრომლობს „ეფ-ეს-ბე"-სთან დაკავშირებულ პირთან, რუსეთის მოქალაქე ვიაჩესლავ კალინინთან, გამოცემა Veteran News-ის მთავარ რედაქტორთან, რომელიც „ეფ-ეს-ბე“-სა და რუსეთის თავდაცვის სამინისტროს საინფორმაციო პარტნიორია.

POLITICO წერს, რომ კალინინმა სხვა ადამიანებიც დაიქირავა, თუმცა, დოკუმენტში არ არის დაზუსტებული რამდენი, ან რომელ ქვეყანაში.

POLITICO-ს ინფორმაციით, კალინინმა ანტიჩი მიიწვია რუსეთში 2019-2020 წლებში რუსეთის უმაღლეს სამხედრო ხელმძღვანელობასთან შესახვედრად. ის თავდაპირველად ორიენტირებული იყო სერბეთის სამოქალაქო საზოგადოებაზე გავლენის მოხდენაზე, შემდეგ კი წყვილმა გააფართოვა თავისი საქმიანობა ევროპულ პროფკავშირებსა და ვეტერანთა ორგანიზაციებსა და ბოლო თვეების განმავლობაში ევროპარლამენტის წევრებზე.