საპროტესტო აქციების მიუხედავად, საბერძნეთის პარლამენტმა უცხოური კერძო უნივერსიტეტების შესახებ კანონი მიიღო.

ამის შესახებ ინფორმაციას სააგენტო Reuters-ი ავრცელებს.

საბერძნეთის პარლამენტის მიერ მიღებული კანონპროექტი უცხოურ კერძო უნივერსიტეტებს საშუალებას მისცემს, რომ ქვეყანაში ფილიალები შექმნან.

საბერძნეთის პრემიერ-მინისტრმა, კირიაკოს მიცოტაკისმა აღნიშნა, რომ ეს გადაწყვეტილება ბერძენი სტუდენტების საზღვარგარეთ სწავლის მიზნით ქვეყნიდან გასვლის პროცესს შეაჩერებს.

კანონპროექტის მიღებას მხარი 159-მა დეპუტატმა დაუჭირა.

სტუდენტები კანონპროექტს უკვე რამდენიმე კვირაა აპროტესტებენ და აცხადებენ, რომ მთავრობის ამ ნაბიჯს, სახელმწიფო უნივერსიტეტების ხარისხზე უარყოფითი გავლენა ექნება.