მეგობრებო, ეს არის რეგიონი, სადაც ყოველი მეოთხე მოქალაქე იბრძვის თავის გადასარჩენად, პირდაპირი ამ სიტყვის მნიშვნელობით. დიახ, დღეს გურიაში 100 000 მაცხოვრებლიდან 25 000 იღებს მიზერულ სოციალურ შემწეობას ან არის სოციალური პროგრამის მონაწილე, - ამის შესახებ "სტრატეგია აღმაშენებლის" საგარეო მდივანმა, სერგო ჩიხლაძემ განაცხადა.

როგორც სერგო ჩიხლაძე აღნიშნავს, დღეს ოჯახები გურიიდან იძულებული არიან ემიგრაციაში წავიდნენ მხოლოდ იმიტომ, რომ გამოკვებონ შვილები და მოხუცი მშობლები.

„ეს ულამაზესი მხარე, გურია დღეს არის ქვეყნის ერთ-ერთი უღარიბესი რეგიონი. ეს არის რეგიონი, სადაც ყოველი მეოთხე მოქალაქე იბრძვის თავის გადასარჩენად, პირდაპირი ამ სიტყვის მნიშვნელობით. დიახ, დღეს გურიაში 100 000 მაცხოვრებლიდან 25 000 იღებს მიზერულ სოციალურ შემწეობას ან არის სოციალური პროგრამის მონაწილე. დღეს გურულები ებრძვიან სიღარიბეს, ფასების ზრდას, გაუსაძლის გადასახადებს, უმუშევრობას და უპერსპექტივობას.

დღეს ოჯახები გურიიდან იძულებული არიან ემიგრაციაში წავიდნენ მხოლოდ იმიტომ, რომ გამოკვებონ შვილები, მოხუცი მშობლები. გული დაგეწვება ყოველ ჯერზე, როცა გურიის სოფლებს გამოივლი და ნახავ ეკალ-ბარდებით გადავლილ ეზოებს, დაბოქლომებულ კარ-მიდამოებს,სადაც წლებია უკვე არავინ ჩამოსულა. რა არის ამის მიზეზი? - გაუსაძლისი ყოფა, გაორმაგებული ფასები, უმუშევრობა და უპერსპექტივობა.

და რას აკეთებს ამ დროს ივანიშვილის მთავრობა ხალხისთვის? ამ კონკრეტული რეგიონისთვის? არაფერს. ისინი მხოლოდ საკუთარ თავსა და ოჯახებზე ზრუნავენ. ივანიშვილი და მისი მინისტრები მდიდრდებიან თქვენ ხარჯზე, ჩვენს ხარჯზე, უბრალო ადამიანების ხარჯზე. ივანიშვილმა და მისმა მინისტრებმა გურულების გაჭირვებაზე თვალი დახუჭეს დიდი ხანია.

მათ არ აინტერესებს როგორ გაჭირვებაში ცხოვრობს აქ ადამიანი, მათ არ აინტერესებს, რომ ბევრი ბავშვი სკოლაში მშიერი დადის, მათ არ აინტერესებთ რომ ოჯახები ლანჩხუთში, ჩოხატაურში, ოზურგეთში ვერ უმკლავდებიან ამ გაორმაგებულ და გასამმაგებულ ფასებს, მათ არ აინტერესებთ და უბრალოდ არ უყვართ ადამიანები. ივანიშვილს და მის მინისტრებს მხოლოდ თავიანთი ფული უყვართ და არა ადამიანები. მივმართავ ივანიშვილს და მის მთავრობას: რა დაგიშავა გურიამ? რა დაგიშავეს გურულებმა? რა დაგიშავა ამ რეგიონმა, რომელიც დღეს ფაქტობრივად დაცლილია.

დროა, ივანიშვილმა და მისმა პარტიამ პასუხი აგოს ეკონომიკის დაქცევაზე და იმ გაუსაძლისი პირობების შექმნაზე, რომელმაც ქართველი კაცი უკიდურეს სიღარიბეში ჩააგდო და ბევრი მათგანი აიძულა ქვეყნიდან გადახვეწილიყო. ჩვენ უკეთესს ვიმსახურებთ. და ეს დროც დგება, ოქტომბერში ჩვენ ერთად, ერთიანობით და პრინციპულობით შევქმნით ამ ქვეყნის უკეთესს მომავალს“, - განაცხადა სერგო ჩიხლაძემ.