ერთი საკადრო გადაწყვეტილებით ოკუპაციის საკითხი არ წყდება - რუსეთთან დიპლომატიური ურთიერთობები შეწყვეტილია, ამიტომ გაღრმავებაზე არ არის საუბარი, - ამის შესახებ პარლამენტის თავმჯდომარემ, შალა პაპუაშვილმა განაცხადა, რითაც უპასუხა კითხვას, „რუსეთთან ურთიერთობის საკითხებში პრემიერ-მინისტრის სპეციალური წარმომადგენლის პოსტზე გიორგი ქაჯაიას დანიშვნა გააღრმავებს თუ არა რუსეთთან ურთიერთობებს“.

მისივე თქმით, ოკუპაციის პრობლემის მოგვარება ერთ ადამიანზე არაა დამოკიდებული.

„სამწუხაროდ, რა თქმა უნდა, ერთ ადამიანზე არ არის დამოკიდებული ეს ურთიერთობები. პრობლემები სხვა რამეშია და ეს არის საქართველოს ტერიტორიების ოკუპაცია. ჩვენ არანაირი ურთიერთობები არ გვაქვს რუსეთთან. იცით, რომ დიპლომატიური ურთიერთობები შეწყვეტილია, ამიტომ აქ გაღრმავებაზე არ არის საუბარი. საუბარია, მთავარ გამოწვევაზე და პრობლემაზე, რომელიც ჩვენს ურთიერთობებშია, ის რომ რუსეთს აქვს საქართველოს ტერიტორიები ოკუპირებული," - განაცხადა პაპუაშვილმა.