ჯანდაცვის სამინისტროს წარმომადგენლები ონკოპაციენტებს და „კავშირი სიცოცხლისთვის“ წევრებს ხვდებიან, რომლებიც მკურნალობისთვის გამოყოფილი 25 ათას ლარიანი ლიმიტის გაუქმებას და ონკოპაციენტების სამკურნალო მედიკამენტების დეფიციტის აღმოფხვრას ითხოვენ.

შეხვედრა ჯანდაცვის სამინისტროში მიმდინარეობს.

ონკოპაციენტები განმარტავენ, რომ სამკურნალოდ გამოყოფილი 25 ათას ლარიანი ლიმიტი არასაკმარისია.

“მოტანილი გვქონდა წერილი მიხეილ სარჯველაძის სახელზე, გვინდოდა პირველივე დღიდან სცოდნოდა, რომ ონკოლოგიურ პაციენტებს სასწრაფოდ სჭირდებათ დახმარება. ჩვენ გვინდა მინისტრი შეგვხვდეს, რათა გავაცნოთ ყველა ის ხარვეზი და პრობლემა, რას ჩვენს სიცოცხლეს უქმნის საფრთხეს. ჩვენი მთავარი მოთხოვნაა, 25 ათას ლარიანი ლიმიტის გაუქმება. პაციენტებს არსებული ლიმიტები ამოეწურათ, დარჩენილი აქვთ გადასხმები, რომელსაც საკუთარი სახსრებით ვერ შეძლებენ. მოუწევთ თავი დაანებონ მკურნალობას. მოვითხოვთ, ეს ლიმიტი გაუქმდეს, პაციენტების უმეტესობას უკვე ამოეწურა ეს ლიმიტები. საკუთარი სახსრებით ვერ აგრძელებენ მკურნალობას. ასევე, ჩვენი მოთხოვნაა, ონკოპაციენტების სამკურნალო წამლების დეფიციტი აღმოიფხვრას, სასიცოცხლოდ მნიშვნელოვანი მედიკამენტები იყოს ქვეყანაში. დიაგნოსტიკა და კვლევებიც აუცილებლად უნდა ფინანსდებოდეს.

ჯანდაცვის სამინისტროს წარმომადგენლები მოვიდნენ და გვითხრეს, რომ 5 ადამიანს შეგვხვდებიან”, - აღნიშნა ორგანიზაციის წევრმა გვანცა აფხაიძემ.