„კოკასა შიგან რაცა დგას, იგივე წარმოდინდების“ - ეს მხოლოდ ყვავილებია, რეალურ შედეგებს ძალიან მალე დაინახავს საზოგადოება, - ამის შესახებ საპარლამენტო უმრავლესობის წევრმა დავით მათიკაშვილმა ჟურნალისტებს, ნიკა მელიასა და ნიკა გვარამიას ერთობაზე განუცხადა, როდესაც უპასუხა კითხვას “მათ შორის შესაძლო უთანხმოებასა და როლების განაწილებაზე”.

როგორც მათიკაშვილმა აღნიშნა, მელიასა და გვარამიას შორის ერთობა შეუძლებელია.

“წარმოუდგენელია ამ ორ “ნაც”, ოდიოზურ პიროვნებას შორის ისეთი ერთობა და ისეთი კონგლომერატი, რომ საზოგადოებას, ჯერ ერთი, თავი შუაშისტურ ძალად მოაჩვენონ და შემდეგ იმდენად ააწყონ შიდაპარტიული თემები, რომ ურთიერთდაპირისპირება არ მოხდეს. ეს არის აბსოლუტურად, სრულიად გამორიცხული რამ. აქაც ჩანს მათი “ნაცური” ბუნება. ის “ტრადიციები”, რაც “ნაციონალური მოძრაობის” ხელისუფლებისგან ერთსაც და მეორესაც დღემდე მოჰყვება. საზოგადოებისთვის კიდეც ერთი დასტურია, რომ რეალურად, არა რაღაც მესამე ძალასთან აქვს საქმე, არამედ ეს არის “ნაციონალური მოძრაობის” ტიპური კლონი (სააკაშვილის მიერ დარქმეული), რომელსაც არჩევნებზე 5%-მდე ასვლა ძალიან გაუჭირდება”, - განაცხადა დავით მათიკაშვილმა.