ჩვენ ხალხი არ ვართ, ჩვენ მაშინ ქვეყანა არ ვართ, არ ვართ ხელისუფლება თუკი სხვა ქვეყნების შანტაჟის ქვეშ მივიღებთ

გადაწყვეტილებას და არა ქართველი ხალხის ინტერესებზე დაყრდნობით, - ამის შესახებ საქართველოს პარლამენტის თავმჯდომარემ, შალვა პაპუაშვილმა ვეტოსთან დაკავშირებით დასმული კითხვის საპასუხოდ განაცხადა.

პაპუაშვილის თქმით, პროცესებს ბოლომდე მიყვებიან და მომავალ კვირას ვეტოს დაძლევენ.

„ბოლო შანსიც, რომელიც დატოვებული იყო შინაარსობრივი დისკუსიისთვის, სალომე ზურაბიშვილმა ჩაკეტა იმით, რომ რამდენიმე დღეში წარმოადგინა ვეტო. ჩვენ 2 თვის მანძილზე ვნახეთ პროცესის და კანონის სტიგმატიზება, დეზინფორმაციული შტურმი და ცრუ პროპაგანდა. 2 თვე დაკარგეს, ნაცვლად შინაარსობრივი დისკუსიისა. შემდეგ იყო 2 კვირიანი შესაძლებლობა, რომ ვეტო შინაარსობრივი მსჯელობისთვის ტექნიკურად ყოფილიყო გამოყენებული, ესეც ჩაკეტეს. ეს აჩვენებს იმას, რომ სინამდვილეში შინაარსობრივი დისკუსია არავის უნდა, ყველა ერიდება, რადგან ყველამ იცის რა იქნება შედეგი. ნებისმიერი დისკუსიის შედეგი ბოლოს, რა თქმა უნდა, იქნება რომ უნდა იყოს გამჭვირვალობა. შეუძლებელია სხვა შედეგი არსებობდეს. ამიტომ ჩვენ მივყვებით ამ პროცესს და მომავალ კვირას იქნება ვეტოს დაძლევა.

რაც შეეხება რეაქციებს, ვერაფერს გეტყვით, ჩვენ ხალხი არ ვართ, ჩვენ მაშინ ქვეყანა არ ვართ, ხელისუფლება არ ვართ თუკი სხვა ქვეყნების შანტაჟის ქვეშ მივიღებთ გადაწყვეტილებას და არა ქართველი ხალხის ინტერესებზე დაყრდნობით“,- განაცხადა პაპუაშვილმა.