ვარშავის გადაწყვეტილებაზე, პოლონეთის ტერიტორიაზე რუსი დიპლომატების გადაადგილება შეზღუდოს, მოსკოვი საპასუხო ზომებს მიიღებს, - ამის შესახებ რუსეთის საგარეო საქმეთა სამინისტროს სპიკერმა, მარია ზახაროვამ განაცხადა.

ზახაროვამ აღნიშნა, რომ რუსეთის საგარეო უწყებამ პოლონეთის მიერ მიღებული გადაწყვეტილების დეტალები ჯერჯერობით არ იცის და რუსეთი პოლონეთის საგარეო საქმეთა სამინისტროსგან შესაბამის ნოტას ელოდება.

„როდესაც ჩვენ მას მივიღებთ, შევისწავლით და საპასუხო ზომებს მივიღებთ, რათა რუსოფობიაში ჩაფლულმა პოლონურმა ელიტამ მორიგი ანტირუსული ნაბიჯის გადადგმა უკიდურესად ინანოს“, - განაცხადა რუსეთის საგარეო საქმეთა სამინისტროს სპიკერმა.

შეგახსენებთ, დღეს, ბრიუსელში, ევროკავშირის საგარეო საქმეთა მინისტრების შეხვედრის დასრულების შემდეგ, პოლონეთის საგარეო საქმეთა მინისტრმა, რადოსლავ სიკორსკიმ განაცხადა, რომ პოლონეთში რუსეთის საელჩოსა და საკონსულოს თანამშრომლებს პოლონეთის ტერიტორიაზე გადაადგილების შეზღუდვები დაუწესდებათ.