ტაჯიკეთის პარლამენტისა და „მოსახლეობისა და განვითარების პარლამენტართა აზიის ფორუმის" (Asian Forum of Parliamentarians on Population and Development, AFPPD) ორგანიზებით, ქალაქ დუშანბეში საერთაშორისო კონფერენცია გაიმართა. კონფერენცია „მდგრადი წყლის რესურსები და დემოკრატიული მედეგობა ახალგაზრდების და გოგონების გაძლიერებისთვის" თემატიკას ეძღვნებოდა.

ამის შესახებ ინფორმაციას საქართველოს პარლამენტი ავრცელებს.

მათივე ცნობით, საერთაშორისო კონფერენციაში მონაწილეობა მიიღო საქართველოს პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარემ გივი მიქანაძემ. კონფერენციის ფარგლებში, კომიტეტის თავმჯდომარე სიტყვით გამოვიდა პანელურ დისკუსიაზე, რომელიც ახალგაზრდების დასაქმების ხელშეწყობას შეეხებოდა.

„მოხსენების ფარგლებში გივი მიქანაძემ საქართველოს გამოცდილებასა და ამ მიმართულებით არსებულ პოლიტიკაზე ისაუბრა. კერძოდ: საქართველოში ახალგაზრდების დასაქმებაზე, როგორც სახელმწიფოს პოლიტიკის პრიორიტეტზე, უმუშევრობის შემცირების პოლიტიკაზე, სამთავრობო პროგრამებსა და პროექტებზე; ახალგაზრდული პოლიტიკის კონტექსტში მიმდინარე პროგრამებსა და ინიციატივებზე.

საერთაშორისო კონფერენციაში მონაწილეობდნენ რუმინეთის, მოლდოვის, ჩრდილოეთ მაკედონიის, ბოსნია-ჰერცეგოვინას, საქართველოს, სომხეთის, აზერბაიჯანის, ბელარუსის, უზბეკეთის, ყაზახეთის, თურქმენეთისა და ტაჯიკეთის სახელმწიფოების პოლიტიკური ლიდერები, პარლამენტების ვიცე-სპიკერები, დარგობრივი კომიტეტების თავმჯდომარეები, საჯარო მოხელეები, საერთაშორისო, სამოქალაქო და სხვა სექტორის წარმომადგენლები.

კონფერენციაზე განიხილეს გაერო-ს მდგრადი განვითარების მიზნებთან დაკავშირებული შემდეგი ასპექტები: ახალგაზრდების გაძლიერება, განათლება, დასაქმება, გენდერული თანასწორობა და სხვა.

ღონისძიების მიზანი იყო პარტნიორ სუბიექტებს შორის მდგრადი განვითარების მიზნების მიღწევის ხელშეწყობა, თანამშრომლობის, დიალოგის, მიღწეული პროგრესის და არსებული გამოწვევების განხილვისა და გამოცდილების გაზიარების გზით.

საერთაშორისო კონფერენციის ფარგლებში მომზადდა დეკლარაცია, რომელშიც ასახულია რეკომენდაციები ახალგაზრდობაში ინვესტირებასთან, გენდერული თანასწორობის ხელშეწყობასა და კლიმატის ცვლილების შედეგად ზიანის შემცირებასთან დაკავშირებით“, - ნათქვამია გავრცელებულ ინფორმაციაში.