რუსეთში, დაღესტნის რესპუბლიკაში ტერაქტების შედეგად დაღუპულთა რიცხვი 20-მდე გაიზარდა. ამის შესახებ რესპუბლიკის ჯანდაცვის მინისტრი, ტატიანა ბელიაევა „ტელეგრამ“ არხზე იუწყება.

”სამწუხაროდ, 20 ადამიანი დაიღუპა, მათ შორის სამართალდამცავები და მშვიდობიანი მოქალაქეები”, - აღნიშნა მინისტრმა.

მისი ინფორმაციით, დაშავებულა 46 ადამიანი, მათ შორის 7 მძიმე მდგომარეობაშია.

შეგახსენებთ, გუშინ დაღესტანში, დერბენტსა და მაჰაჩყალაში შეიარაღებული პირები ორ მართლმადიდებლურ ეკლესიაში, სინაგოგასა საგზაო პოლიციის განყოფილებას დაესხნენ თავს. ხელისუფლების ინფორმაციით, ლიკვიდირებულია 5 თავდამსხმელი. დაღესტნის საგამოძიებო კომიტეტის დეპარტამენტმა სისხლის სამართლის საქმე „ტერორისტული თავდასხმისა“ და „ცეცხლსასროლი იარაღის უკანონო შეძენა, შენახვა, გადატანის“ მუხლებით აღძრა. რესპუბლიკაში 24, 25 და 26 ივნისი გლოვის დღეებად გამოცხადდა.