პარლამენტში დღეს უსაფრთხოების „ყვითელი დონე“ იმოქმედებს - შენობაში დაიშვებიან მხოლოდ ტელემაუწყებლების აკრედიტებული ჟურნალისტები
საქართველოს პარლამენტი დღეს უსაფრთხოების დამატებითი ზომების შესახებ განცხადებას ავრცელებს.
დღეს, საქართველოს პარლამენტის სასახლეში უსაფრთხოების "ყვითელი დონე" იმოქმედებს, შენობაში დაიშვებიან ტელემაუწყებლების აკრედიტებული ჯგუფები საპარლამენტო ღონისძიებების დასრულებამდე, რაც იმას ნიშნავს, რომ ადგილზე მუშაობის საშუალება სხვა მედიების წარმომადგენლებს არ ექნებათ.
"საქართველოს პარლამენტის სასახლეში უსაფრთხოების დაცვის წესის დამტკიცების თაობაზე“ საქართველოს პარლამენტის თავმჯდომარის 2023 წლის 04 სექტემბრის N1/259/23 ბრძანების შესაბამისად, მიმდინარე წლის 28 ივნისს, საქართველოს პარლამენტის სასახლეში იმოქმედებს უსაფრთხოების ყვითელი დონე - ვიზიტორებს ეზღუდებათ პარლამენტის სასახლეში შესვლა. დაგეგმილ საპარლამენტო ღონისძიებებზე (მათ შორის კომიტეტის და პლენარულ სხდომებზე) დაიშვებიან მხოლოდ შესაბამისი სტრუქტურული ერთეულების მიერ მოწვეული პირები. შენობაში დაიშვებიან ტელემაუწყებლების/ტელემედია საშუალებების აკრედიტებული არაუმეტეს სამი ჯგუფი თითო მაუწყებლიდან, საპარლამენტო ღონისძიებების დასრულებამდე. აღნიშნული ღონისძიების მიზანია საქართველოს პარლამენტის სასახლეში სამუშაო და უსაფრთხო გარემოს უზრუნველყოფა", - წერია განცხადებაში.
28 ივნისის პლენარულ სხდომაზე პრემიერ-მინისტრი ირაკლი კობახიძე ყოველწლიური მოხსენებით წარდგება.
