რუსეთის ბრალდებები სრული სიცრუე და აბსურდია, საკმაოდ ირონიულია, რომ ამ ბრალდებებს აკეთებს ქვეყანა, რომელსაც ახლა საქართველოს ტერიტორიის 20 პროცენტი აქვს ოკუპირებული, - ამის შესახებ აშშ-ის სახელმწიფო დეპარტამენტის პრესსპიკერმა, მეთიუ მილერმა ბრიფინგზე განაცხადა.

მილერი გამოეხმაურა რუსეთის საგარეო დაზვერვის მიერ გამოქვეყნებულ განცხადებას, თითქოს აშშ საქართველოში რეჟიმის ცვლილებას გეგმავს და თითქოს ბაიდენის ადმინისტრაციამ ფართო მასშტაბის საინფორმაციო კამპანია მოამზადა მმართველი “ქართული ოცნების” პარტიის დისკრედიტაციისთვის.

“საკმაოდ ნათელია, რომ ეს სრული სიცრუეა. რუსეთი პირველად არ აკეთებს მსგავს ბრალდებებს აშშ-ის ჩართულობასთან დაკავშირებით საქართველოში და მსოფლიოს მასშტაბით სხვა ქვეყნებში, რაც სრული სიცრუე და აბსურდი იყო. აღვნიშნავ იმ ირონიას, რომ ქვეყანა - რუსეთი - რომელიც არალეგალურად ახდენს საქართველოს ტერიტორიის 20 პროცენტის ოკუპაციას ახლა, როცა ჩვენ ვსაუბრობთ, ასეთ ბრალდებებს აკეთებს სხვა ქვეყანასთან დაკავშირებით”, - განაცხადა მილერმა.