საქართველო დემოკრატიის კუთხით ღრმა გამოწვევის წინაშე დგას, რაც „უცხოური გავლენის გამჭვირვალობის“ შესახებ კანონის მიღებასა და დემოკრატიული უკუსვლის სხვა რამდენიმე ნიშანთანაა დაკავშირებული, - ამის შესახებ აშშ-ის საერთაშორისო განვითარების სააგენტოს წარმომადგენელმა, ალექსანდრე სოკოლოვსკიმ თბილისში მიმდინარე ორდღიანი კონფერენციის, „გარდამტეხი წელი“ ფარგლებში გამართულ პანელზე განაცხადა.

“რა შეუძლია და რა უნდა გააკეთოს საქართველომ უახლოეს მომავალში? - პირველი არის კარგად მართული, მშვიდობიანი, გამჭვირვალე, თავისუფალი და სამართლიანი არჩევნები. სანდო საარჩევნო პროცესი გადამწყვეტი იქნება არა მხოლოდ ევროკავშირის იმედებისა და მისწრაფებების შესანარჩუნებლად, არამედ უფრო ფართოდ დემოკრატიისთვისაც და USAID-ი მხარს უჭერს არჩევნების ძლიერ შიდა და საერთაშორისო ზედამხედველობას გრძელვადიანი და მოკლევადიანი დამკვირვებლების სადამკვირვებლო მისიების მეშვეობით. USAID-ი ასევე ტექნიკურ მხარდაჭერას უწევს ცენტრალურ საარჩევნო კომისიას. მეორე, ჩვენ გვსურს ვიხილოთ სამოქალაქო მონაწილეობის მაღალი დონე ამ არჩევნებში. ამომრჩევლების მაღალი აქტივობა ასევე ძალიან მნიშვნელოვანია საზოგადოებრივი ნდობისთვის ამ პროცესის მიმართ”, - აღნიშნა საერთაშორისო განვითარების სააგენტოს წარმომადგენელმა.

მისი თქმით, მესამე მნიშვნელოვანი ნაბიჯი, რომელიც საქართველომ შეიძლება გადადგას მთავრობასა და სამოქალაქო საზოგადოებას შორის დიალოგია.

„მესამე, ახალმა პარლამენტმა და ამომრჩევლებისგან მინიჭებულმა ახალმა მანდატებმა შეიძლება შექმნას ახალი დიალოგის შესაძლებლობა მთავრობასა და სამოქალაქო საზოგადოებას შორის. ახლა მე ვაღიარებ, რომ ამ დიალოგის მიმართ რეალური კეთილსინდისიერი ძალისხმევა შეიძლება შორს ჩანდეს და შეიძლება არ აღმოჩნდეს განხორციელებადი, მაგრამ გარწმუნებთ, რომ სანდო საარჩევნო პროცესი ამას უფრო შესაძლებელს ხდის და რომ საბოლოოდ ჩვენ უნდა მივიდეთ ამ დიალოგამდე რაღაც მომენტში. USAID სიამოვნებით დაუჭერს მხარს, ისევე როგორც ამას მრავალი წლის განმავლობაში აკეთებდა ამ ტიპის დიალოგებს სახელმწიფოსა და სამოქალაქო საზოგადოებას შორის. საქართველოს ჯერ კიდევ შეუძლია მოიკიდოს ფეხი დემოკრატიის კონსოლიდაციისა და ევროპისკენ მიმავალ გზაზე. ეს შეიძლება მოხდეს ეტაპობრივად და პირველი მნიშვნელოვანი ნაბიჯი არის ეს არჩევნები ოქტომბერში“, -აღნიშნა ალექსანდრე სოკოლოვსკიმ.