უკრაინის დედაქალაქ კიევში საჰაერო განგაში 9 საათზე მეტხანს გაგრძელდა, სამიზნეს რუსული ძალების მიერ გაშვებულმა ვერცერთმა დრონმა ვერ მიაღწია, - ამის შესახებ ინფორმაციას კიევის საქალაქო-სამხედრო ადმინისტრაცია ავრცელებს.

„მორიგი ხანგრძლივი მასიური თავდასხმა რუსული უპილოტო საფრენი აპარატებით. დედაქალაქში განგაში 9 საათზე მეტ ხანს უწყვეტად გაგრძელდა. მთელი ამ ხნის განმავლობაში რუსული დრონები, პირველადი ინფორმაციით, Shahed-ები, ცდილობდნენ დედაქალაქზე შეტევას. ამჯერად კიევში ძირითადად სათითაოდ შევიდნენ და არა ჯგუფურად. მაგრამ მტრის ვერცერთმა უპილოტო საფრენმა აპარატმა სამიზნეს ვერ მიაღწია! გააუნებელყვეს ყველა დრონი, რომელიც ემუქრებოდა დედაქალაქს“, - აცხადებენ კიევის საქალაქო-სამხედრო ადმინისტრაციაში.

ამ დროისთვის არსებული ინფორმაციით, დრონებით თავდასხმის შედეგად არავინ დაღუპულა, ან დაშავებულა.

ამასთან, კიევის საქალაქო-სამხედრო ადმინისტრაციის ინფორმაციით, დედაქალაქში მეტროპოლიტენის მოძრაობასთან დაკავშირებული პრობლემებია.