რუსეთის საზღვაო-სამხედრო ძალებმა დაგეგმილი სტრატეგიული სამეთაურო-საშტაბო სწავლება - „ოკეანე-2024“ დაიწყო, - ინფორმაციას რუსეთის თავდაცვის სამინისტრო ავრცელებს.

უწყების ცნობით, წვრთნები წყნარი და არქტიკის ოკეანეების და ხმელთაშუა, კასპიისა და ბალტიის ზღვების წყლებში ჩატარდება და 16 სექტემბრის ჩათვლით გაგრძელდება.

„წვრთნებში 400-ზე მეტ სამხედრო ხომალდი, წყალქვეშა ნავი და ფლოტის დამხმარე გემი, 120-ზე მეტი თვითმფრინავი და საზღვაო ავიაციის ვერტმფრენი, საზღვაო და საჰაერო კოსმოსური ძალები, დაახლოებით 7000 ერთეული იარაღი, სამხედრო და სპეცტექნიკა, ასევე 90000-ზე მეტი პერსონალი ჩაერთვება“, - აცხადებენ რუსეთის თავდაცვის უწყებაში.

წვრთნების პირველ ეტაპზე რუსი სამხედროები შეიმუშავებენ საკითხებს, რომლებიც დაკავშირებულია ძალების ჯგუფების საბრძოლო მომზადების ადგილებში განლაგებასთან, ხოლო მეორე ეტაპზე ისინი განახორციელებენ „საბრძოლო მოქმედებებს“ სტრატეგიულად მნიშვნელოვანი ობიექტების და იმიტირებული მტრის ძალების დასამარცხებლად.

ამასთან, რუსეთის თავდაცვის სამინისტროს ინფორმაციით, წვრთნებში ჩაერთვება ჩინეთის საზღვაო ძალების ოთხი ხომალდი და ერთი დამხმარე გემი.

წვრთნებთან დაკავშირებით ინფორმაციას ავრცელებს ჩინეთის თავდაცვის სამინისტროც. უწყების ცნობით, ორი ფლოტი წყნარ ოკეანეში მეხუთედ ერთად გაცურავს და ერთად მიიღებენ მონაწილეობას რუსეთის წვრთნებში : „ოკეანე-24“.