ლევან ხაბეიშვილი - ვწუხვარ, რომ სახელმწიფოს ასეთი კრიმინალები წარმოადგენენ, თუმცა იმასაც ვხედავთ, რომ მყისიერად დადგა შედეგი - ხარაზიშვილის, მილერის და სხვების წინააღმდეგ - სხვა ძალოვნებისთვის ეს უნდა იყოს გაფრთხილება
ვწუხვარ იმის გამო, რომ საქართველოს სახელმწიფოს ასეთი კრიმინალები წარმოადგენენ, თუმცა იმასაც ვხედავთ, რომ მყისიერად დადგა შედეგი - ხარაზიშვილის, მილერის და სხვების წინააღმდეგ. მათი მომავალი უკავშირდება პატიმრობას და სხვა ძალოვნებისთვის ეს უნდა იყოს გაფრთხილება, - ამის შესახებ „ერთიანობა ნაციონალური მოძრაობის“ პოლიტსაბჭოს თავმჯდომარემ, ლევან ხაბეიშვილმა განაცხადა, როდესაც ისაუბრა აშშ-ს მიერ, მათ შორის გდდ-ს ხელმძღვანელის ზვიად ხარაზიშვილისა და მისი მოადგილის დასანქცირებაზე.
ლევან ხაბეიშვილის თქმით, მარტის აქციების დროს მის ფიზიკურ ანგარიშსწორებაში ზვიად ხარაზიშვილი მონაწილეობდა.
„მე ეს პარლამენტში მეორე დღესვე, დილით განცხადების გაკეთების დროს დეტალურად მოვყევი, როგორ დემონსტრაციულად არ ჰქონდა ნიღაბი, როგორ ცდილობდა შიშის გრძნობა დაეთესა და ა.შ. ვწუხვარ იმის გამო, რომ საქართველოს სახელმწიფოს ასეთი კრიმინალები წარმოადგენენ, თუმცა იმასაც ვხედავთ, რომ მყისიერად დადგა შედეგი - ხარაზიშვილის, მილერის და სხვების წინააღმდეგ. მათ ესმით, რომ მათი მომავალი უკავშირდება პატიმრობას. აშშ-ის მხრიდან სანქცია მაღალი თანამდებობის პირზე ისტორიას არ ახსოვს, არ არსებულა, არ ყოფილა, თუმცა ჩვენ ვხედავთ, რომ ეს რეალობა დადგა. სხვა ადამიანები, ვგულისხმობ ძალოვნებს, უნდა გაფრთხილდნენ. 26 ოქტომბერი არის ის დღე, როდესაც ქართველი ხალხი გაიმარჯვებს და მათ უნდა ესმოდეთ, რომ ეს გამარჯვება უნდა იზეიმონ ქართველ ხალხთან ერთად და არ უნდა მოემზადონ ძალადობრივი მოქმედებებისთვის“, - განაცხადა ლევან ხაბეიშვილმა.
ცნობისთვის, აშშ-მა ადამიანის უფლებების სერიოზული დარღვევისთვის ქართველი ოფიციალური პირები და ექსტრემისტები დაასანქცირა. კერძოდ, აშშ-ის სახაზინო დეპარტამენტმა მშვიდობიანი დემონსტრანტებისა და პოლიტიკური ოპონენტების ძალადობრივ დარბევასთან დაკავშირებით საქართველოს მთავრობის ორ ოფიციალურ პირსა და ორ კერძო პირს სანქციები დაუწესა. აშშ-ის სახაზინო დეპარტამენტის მიერ დასანქცირდნენ განსაკუთრებულ დავალებათა დეპარტამენტის ხელმძღვანელი, ზვიად ხარაზიშვილი, იგივე "ხარება" და მისი მოადგილე მილერი ლაგაზაური, „ალტ-ინფოს“ დამფუძნებელი კონსტანტინე მორგოშია და ზურაბ მახარაძე.
გარდა ამისა, აშშ-ის სახელმწიფო დეპარტამენტი სავიზო შეზღუდვებს აწესებს საქართველოში დემოკრატიის ძირის გამოთხრაში მონაწილე 60-ზე მეტი ქართველისა და მათი ოჯახის წევრების წინააღმდეგ.
