ჭიათურის სოფელ შუქრუთის მცხოვრებლებმა საქართველოს პარლამენტთან შიმშილობა შეწყვიტეს, მაგრამ პროტესტს აგრძელებენ.

აღნიშნული გადაწყვეტილება შუქრუთელებმა მას შემდეგ მიიღეს, რაც მათი თქმით, „ქართული ოცნების“ დეპუტატი, რატი იონათამიშვილი პარლამენტის წინ მივიდა და მოსახლეობას კომპანია, „ჯორჯიან მანგანეზთან” მოლაპარაკებებში შუამავლობა შესთავაზა.

აქციის მონაწილეების ინფორმაციით, მომდევნო შეხვედრა 15 ოქტომბერს უნდა ჩატარდეს.

„შევთანხმდით, რომ შეიქმნება სამმხრივი კომისია - მოსახლეობის, კომპანიის და სახელმწიფოს წარმომადგენლებით დაკომპლექტებული. ჩვენ ვუთხარით ჩვენი პრობლემების შესახებ. აქცია არ წყდება, ჩვენ ისევ პროტესტის რეჟიმში ვართ. ერთადერთი, შევთანხმდით იმაზე, რომ მოშიმშილეები შეწყვეტდნენ შიმშილს. შემდეგ შეხვედრამდე, ჩვენ წარვუდგენთ დოკუმენტურად ჩვენს მოთხოვნებს და გავაგრძელებთ იქამდე, ვიდრე კონკრეტული დოკუმენტი არ შეიქმნება. მივიღეთ იმის დასტური, რომ შეასრულებს სახელმწიფო მედიატორის როლს და შემდეგ ზედამხედველობას იმ შეთანხმების აღსრულებას გაუწევს, რაც კომპანიასა და მოსახლეობას შორის მიიღწევა“, - აღნიშნულის შესახებ აქციის ერთ-ერთმა მონაწილემ მედიას განუცხადა.

ცნობისთვის, ჭიათურის სოფელ შუქრუთის მოსახლეობის ნაწილი კომპანია „ჯორჯიან მანგანეზისგან“ ზიანის ანაზღაურებას უკვე თვეებია ითხოვს. შუქრუთელები საქართველოს პარლამენტის წინ 43 დღის განმავლობაში შიმშილობდნენ.