ცენტრალური საარჩევნო კომისიის იურიდიული დეპარტამენტის უფროსის, გიორგი სანტურიანის განცხადებით, სააპელაციო სასამართლოს მოსამართლემ, თეთრიწყაროსა და წალკის 30 საარჩევნო უბნის შედეგების ბათილად ცნობასთან დაკავშირებით რაიონული სასამართლოს გადაწყვეტილება გააუქმა.

როგორც მან ჟურნალისტებს განუცხადა, დადასტურდა, რომ ჩარჩო კონვერტის გამოყენებით ფარულობა ამომრჩევლის მიერ ნების გამოვლენის პროცესში სრულად იყო უზრუნველყოფილი.

„თბილისის სააპელაციო სასამართლოს მიერ ახლახან გამოცხადდა გადაწყვეტილების სარეზოლუციო ნაწილი, რომლის თანახმადაც არ დაკმაყოფილდა „საქართველოს ახალგაზრდა იურისტთა ასოციაციის“ სააპელაციო საჩივრები და ასევე, კოალიცია „ჩემი ხმის“ საჩივრები. ასევე, მეორეს მხრივ დაკმაყოფილდა საარჩევნო ადმინისტრაციის შესაბამისი საოლქო საარჩევნო კომისიების, წალკისა და თეთრიწყაროს, სააპელაციო საჩივრები. აქედან გამომდინარე, გაუქმდა თეთრიწყაროს რაიონული სასამართლოს გადაწყვეტილება. შესაბამისი არგუმენტაცია, მათ შორის, ჩვენ მიერ გაჟღერდა სასამართლო სხდომაზე. ამ ეტაპზე, მხოლოდ გადაწყვეტილების სარეზოლუციო ნაწილია ცნობილი. შესაბამისად, სასამართლო რა არგუმენტაციას ეყრდნობოდა გადაწყვეტილების მიღებისას, ჩვენთვისაც უცნობია. რაც შეგვიძლია გავაჟღეროთ არის ის, რომ როგორც ახლა, ასევე სხვა პერიოდში დასტურდებოდა და დასტურდება ის, ჩარჩო კონვერტის გამოყენებით ფარულობა ამომრჩევლის მიერ ნების გამოვლენის პროცესში სრულად იყო უზრუნველყოფილი. ამავდროულად, პირველი ინსტანციის დროს საქმის განხილვისას ჩვენ ასევე, მივუთითებდით ფარულობის პრინციპის დაცვაზე. საბოლოო ჯამში, სააპელაციო სასამართლო საკუთარ გადაწყვეტილებაში რა არგუმენტაციასაც ეყრდნობოდა, ეს, ამ ეტაპზე, ჩვენთვისაც უცნობია.

ამასთან, განხილულ იქნა ყველა შემთხვევა და შესაბამისად, მიღებულ იქნა გადაწყვეტილება. ვფიქრობ, რომ იმგვარი დარღვევები, რომელიც მაგალითად ბათილად ცნობის საფუძველი შეიძლება გამხდარიყო, არ დაფიქსირებულა“,- განაცხადა გიორგი სანტურიანმა.