გურამ მაჭარაშვილი - შოლცი და მაკრონი ვის დაუჭერენ მხარს, რატომ არის მნიშვნელოვანი?! - შე დალოცვილო, შენი მთავრობისთვის ვერ მიგიხედავს, კოალიცია თავზე დაგემხო და რა საქართველოს არჩევნებზე ლაპარაკობ?
რას ნიშნავს შოლცი და მაკრონი არ დაგვიჭერს მხარს?! მათ ვინ უჭერს მხარს?! - გერმანელი ხალხი შოლცს არ უჭერს მხარს და არც საფრანგეთის მოსახლეობა უჭერს მხარს მაკრონს და მათ პოლიტიკურ ძალებს! ისინი ვის დაუჭერენ მხარს, რატომ არის ეს დემოკრატიისთვის მნიშვნელოვანი?! - ასე უპასუხა დეპუტატმა გურამ მაჭარაშვილმა საფრანგეთის პრეზიდენტის, გერმანიის კანცლერის და პოლონეთის პრემიერ-მინისტრის ერთობლივ განცხადებაზე დასმულ კითხვას, სადაც ევროპელი ლიდერები საქართველოში არსებული პოლიტიკური ვითარების გამო შეშფოთებას გამოხატავენ და ხელისუფლებას კურსის შეცვლისა და რეფორმების გატარებისკენ მოუწოდებენ.
მაჭარაშვილმა ამ კონტექსტში აღნიშნა ისიც, რომ “როგორც აშშ-ს არჩევნებით დადასტურდა, რომ ამერიკელი ხალხის ნებას ბაიდენის ადმინისტრაცია არ გამოხატავდა, იგივეა მაკრონთან და შოლცთან დაკავშირებით“.
მაჭარაშვილის თქმით, “ევროკავშირს, აშშ-ს და საქართველოს სურს იყოს სუვერენულები და ერთმანეთთან ჰქონდეთ პარტნიორული და არა ვასალური ურთიერთობები“.
“მე არ ვიცი, რა გრძნობა შეიძლება დაეუფლოს ევროპის წამყვანი სახელმწიფოს ლიდერს, რომელიც საკანონმდებლო ორგანოში საქართველოს საკითხს განიხილავს და მეორე დღეს კოალიცია დაეშლება და არჩევნები დაინიშნება.
არ მესმის, მაკრონის, რომლის პარტიაც მეორე ადგილას გავიდა და არჩევნები დასჭირდა. შოლცის პარტიაc მესამე ადგილზე გავიდა და საერთოდ კოალიცია დაეშალა. ისინი რატომღაც საქართველოს არჩევნებისთვის იცლიან. რა თქმა უნდა, ეს ყველაფერი ფარსია, მათ ავალებენ და ამიტომაც ამბობნენ!
მინიმუმ კომიკურია - ამას ქართული და გერმანული საზოგადოება უყურებს.
შე დალოცვილო, შენი მთავრობისთვის ვერ მიგიხედავს, კოალიცია თავზე დაგემხო და არჩევნები დაგენიშნა - რა საქართველოს არჩევნებზე ლაპარაკობ, როდესაც ეუთო/ოდირმა დაგიწერა, რომ აქ ნორმალური არჩევნები ჩატარდა.
საფრანგეთისა და გერმანიის მსგავსად, ბაიდენის ადმინისტრაციაც გვემუქრებოდა და მიიღეს ტრადიციული, ოჯახის ღირებულებების დამცავი ადამიანი პრეზიდენტად.
პარლამენტის მიერ მიღებულ კანონებს საქართველოს მოსახლეობის აბსოლუტური უმრავლესობა ეთანხმება, რომელმაც “ქართულ ოცნებას“ 54%-ით მხარი დაუჭირა. ამ კანონების უკან ქართული საზოგადოების აბსოლუტური უმრავლესობა დგას - კეთილი ინებონ, ქართულ საზოგადოებას პატივის სცენ და თავის საქმესა და თავის სახელმწიფოს მიხედონ - ჩვენ გვინდა პარტნიორული ურთიერთობა და არა ვასალური დამოკიდებულება!“, - განაცხადა გურამ მაჭარაშვილმა.
