ისრაელის პრემიერ-მინისტრი ბენიამინ ნეთანიაჰუ, შესაძლოა, დააპატიმრონ, თუ ის გერმანიაში ჩავა, - გამოცემა DPA-ს ინფორმაციით, ამის შესახებ გერმანიის საგარეო საქმეთა მინისტრმა, ანალენა ბაერბოკმა განაცხადა.

„გერმანიის მთავრობა ემორჩილება კანონს, რადგან არავინ დგას კანონზე მაღლა“, - აღნიშნა ბერბოკმა.

შეგახსენებთ, სისხლის სამართლის საერთაშორისო სასამართლომ გასული კვირის ხუთშაბათს ისრაელის პრემიერ-მინისტრისა და ყოფილი თავდაცვის მინისტრის, იოავ გალანტის დაპატიმრებების ორდერი გასცა ომისა და კაცობრიობის წინაშე მათ მიერ ჩადენილი შესაძლო დანაშაულების გამო. სისხლის სამართლის საერთაშორისო სასამართლოს მონაწილე სახელმწიფოები, მათ შორის გერმანია, ვალდებულები არიან სასამართლოს მიერ გაცემული დაპატიმრების ორდერი აღასრულონ.