პრემიერ-მინისტრ ირაკლი კობახიძის განცხადებით, სალომე ზურაბიშვილს 29 დეკემბერს ეწურება საპრეზიდენტო უფლებამოსილების ვადა, „შესაბამისად, მისთვის აქტუალური საერთოდ არ არის აშშ-ის პრეზიდენტის ინაუგურაცია“.

კობახიძემ სალომე ზურაბიშვილის დონალდ ტრამპთან შეხვედრა შეაფასა და აღნიშნა, რომ ქართული საზოგადოება დიდი ოპტიმიზმით ელოდება ახალი პრეზიდენტის ინაუგურაციას, რასაც „სალომე ზურაბიშვილი ვერ მოუსწრებს“.

„ვფიქრობთ, რომ 20 იანვრიდან მნიშვნელოვნად შეიცვლება მსოფლიოში ყველაფერი. მნიშვნელოვნად დამშვიდდება, მათ შორის ჩვენი რეგიონი. ჩვენ ველოდებით აშშ-ში პრეზიდენტის ინაუგურაციას. დიდი იმედი გვაქვს, რომ 20 იანვრიდან მნიშვნელოვნად დამშვიდდება ეს რეგიონი და ეს დადებითად უნდა აისახოს ჩვენს ქვეყანაზეც. შესაბამისად, ქართული საზოგადოება დიდი ოპტიმიზმით ელოდება ახალი პრეზიდენტის ინაუგურაციას. ამ მომენტს სალომე ზურაბიშვილი ვერ მოუსწრებს, მას 29 დეკემბერს უკვე ეწურება უფლებამოსილების ვადა. შესაბამისად, მისთვის აქტუალური საერთოდ არ არის აშშ-ის პრეზიდენტის ინაუგურაცია. ვფიქრობ, ყველაფერი ძალიან კარგად იქნება და ის ცვლილებები, რომელიც აშშ-ში განხორციელდება, ასევე ამაზე მეტყველებს“,-განაცხადა კობახიძემ.

ცნობისთვის, სალომე ზურაბიშვილი პარიზში აშშ-ის არჩეულ პრეზიდენტს, დონალდ ტრამპს შეხვდა.