მეტრო „რუსთაველის“ მიმდებარე ტერიტორიაზე ერთი პირი დააკავეს.

არსებული ინფორმაციით, დაკავებულია გიორგი ნადარაია, რომელიც კრიმინალური პოლიციის თანამშრომლებმა ავტომობილში ჩასვეს და წაიყვანეს.

როგორც პარტია "ახალის" პრესსამსახურის მირანდა ბაღათურიას მიერ გავრცელებულ ვიდეოში, თვითმხილველები აცხადებენ, მისი დაკავება კრიმინალური პოლიციის მხრიდან "უსაფუძვლოდ მოხდა". მანამდე მას "ზედაპირული ჩხრეკა" ჩაუტარეს. სხვა დეტალები ამ დროისთვის, უცნობია.

რესპუბლიკის მოედნის მიმდებარე ტერიტორიაზე მობილიზებული არიან სამართალდამცველები.

ჯგუფ "დაიტოვეში" ვრცელდება ცნობები სხვა დაკავებულების თაობაზეც, თვითმხილველები ამბობენ, რომ მათ შორის "სტამბას" მიმდებარედ, კოსტავას ქუჩაზე, სულ მცირე 2 პირი დააკავეს.

ამასთან, რუსთაველის გამზირზე და მიმდებარე ქუჩებზე დგანან საპატრულო პოლიციის ეკიპაჟები.

მომიტინგეების ინფორმაციით, მიმდინარეობს მოქალაქეების ჩხრეკა.

შეგახსენებთ, რუსთაველის გამზირზე საპროტესტო აქცია დაახლოებით 2:00 საათზე დასრულდა.