ჭავჭავაძის გამზირზე, სადაც პიარისა და მარკეტინგის სპეციალისტების საპროტესტო მსვლელობა იმართება, თბილისის ვაკის მაცხოვრის ფერისცვალების სახელობის ტაძართან, მამა შალვა კეკელიასა და აქციის მონაწილეებს შორის სიტყვიერი დაპირისპირება მოხდა.

შელაპარაკება მოჰყვა აქციის მონაწილეების რეპლიკებს ტაძართან მდგომი სამღვდელოების წარმომადგენლების მიმართ, თუ რატომ არ საუბრობს ეკლესია აქციებზე მომხდარ ძალადობასთან დაკავშირებით ხმამაღლა.

აღნიშნულთან დაკავშირებით მამა შალვა კეკელიამ განაცხადა, რომ ის ძალადობას გმობს და ამაზე ქადაგების დროსაც საუბრობს.

გარდა ამისა, აქციის მონაწილეების სხვადასხვა შეძახილის საპასუხოდ კეკელიამ განაცხადა: „ჩვენი ქვეყნის ერთგული ვარ. ვინაა რუსი? ვინც რუსეთის პოლიტიკას ემხრობა, ყველა წყეული იყოს“.

„ადამიანის ცემაზე ცუდი დედამიწაზე არაფერია. ადამიანის მიერ სხვა ადამიანზე ხელის აღმართვა და ბავშვის გალახვა, ღვთის გმობაა. ვთქვი ეს ქადაგებაში და დავგმე, გავაპროტესტე ბავშვების ცემა. ყოველდღე ვიხდი პარაკლისებს, ყოველ ღამე ვლოცულობ, ერთი წუთი არ მძინებია, ჩემი ქვეყნისთვის და ერისთვის. მღვდელი რომ დასჭირდებათ, ჩვენ გვეძახიან. რომ გარდაეცვლებათ შვილი, ვინ უნდა მივიდეს ამ ხალხთან?! გაგვანადგურეთ მაშინ. ეს იყო კომუნისტების დროს, ანადგურებდნენ მღვდლებს. რატომ გვიყვირით აქ? ხალხი გვიყვირის“,- განაცხადა მამა შალვა კეკელიამ.