გუშინ, „ერთიანობა ნაციონალური მოძრაობის“ ოფისი ააფეთქეს გორში და ეს ყველაფერი მოწმობს იმას, რომ რეჟიმი არ აპირებს თავისით გაჩერებას, მაგრამ საბედნიეროდ, არც ქართველი ხალხი აპირებს გაჩერებას, დაღლას და არც ჩვენი მეგობრები აპირებენ საქართველოს მხარდაჭერის შეჩერებას, - ამის შესახებ „ერთიანობა - ნაციონალური მოძრაობის“ ერთ-ერთმა ლიდერმა, გიორგი ბარამიძემ ბრიფინგზე განაცხადა.

მისივე თქმით, დასავლელი პარტნიორების მხრიდან საქართველოს და ქართველი ხალხის მხარდაჭერა გაგრძელდება, ისევე როგორც გაგრძელდება ქართველი ხალხის ბრძოლა.

როგორც ბარამიძე აღნიშნავს, ამერიკის შეერთებული შტატებისა და ევროკავშირის მხრიდან „ქართული ოცნების“ წევრების მიმართ სანქცირების დაწესების პროცესი გაგრძელდება.

„სამწუხარო ვითარება გვაქვს ქვეყანაში, როდესაც ხელისუფლების ბერკეტებს დროებით ფლობს ივანიშვილის კრიმინალური და მოღალატური ბანდა, „გავრილოვების ბანდა“, რომელიც არ ერიდება მოსახლეობის კვლავ და კვლავ მოტყუებას და ცდილობს, რომ უმძიმესი ვითარება, რაც არის ქვეყანაში, შეალამაზოს. ნაცვლად, როგორც მოლდოვამ მიიღო, მილიარდების მიღებისა, საქართველო იღებს ძალიან სერიოზულ პრობლემას ევროკავშირში ჩვენი გაწევრიანების გაჩერების სახით და ამ მოღალატეთა ბანდის დასანქცირების სახით. ესენი არა მარტო სავიზო რეჟიმით დასანქცირდებიან როგორც ამერიკის შეერთებული შტატების მხრიდან, ისე ევროკავშირის მხრიდან, არამედ იქნება სხვა სახის ფინანსური და სხვა ტიპის სანქციები, რადგანაც არ არსებობს, რომ ამერიკის შეერთებულმა შტატებმა და ევროკავშირმა მოითმინოს ის ვითარება, რაც ხდება, როდესაც ეს რეჟიმი არბევს მშვიდობიან მოქალაქეებს, აწამებს ახალგაზრდებს, აპატიმრებს პოლიტიკურ ოპოზიციას, არბევს ჩვენს ოფისებს. გუშინ „ერთიანობა ნაციონალური მოძრაობის“ ოფისი ააფეთქეს გორში და ეს ყველაფერი მოწმობს იმას, რომ ეს რეჟიმი არ აპირებს თავისით გაჩერებას, მაგრამ საბედნიეროდ, არც ქართველი ხალხი აპირებს გაჩერებას, დაღლას და არც ჩვენი მეგობრები აპირებენ საქართველოს მხარდაჭერის შეჩერებას. საქართველოს და ქართველი ხალხის მხარდაჭერა გაგრძელდება, ისევე როგორც ქართველი ხალხის ბრძოლა. ჩვენ ყველანი ერთად ვიბრძოლებთ ამ მოღალატური რეჟიმის წინააღმდეგ და აუცილებლად მივაღწევთ მათ ხელისუფლების ბერკეტებიდან ჩამოცილებას და ჩვენი მეგობრების დახმარებით, თავისუფალი და სამართლიანი არჩევნების ჩატარებას“, - განაცხადა ბარამიძემ.