ამ შეხვედრაზე ჩემი მოსვლის ერთ-ერთი მთავარი მიზანი იყო, რომ მისთვის [ალენ ბერსესთვის] მეთქვა იმ ადამიანების სათქმელი, რომლებიც ამას თვითონ ვერ მოახერხებენ - იმიტომ, რომ ან უკანონოდ დაპატიმრებულები არიან, ან ისე არიან ნაცემები, რომ არ შეუძლიათ დღეს, ამ შეხვედრაზე მოვიდნენ, - ამის შესახებ „ძლიერი საქართველოს“ ერთ-ერთმა ლიდერმა, ლევან ცუცქირიძემ ევროსაბჭოს დელეგაციასთან გამართული შეხვედრის შემდეგ განაცხადა.

ცუცქირიძის თქმით, მისი მიზანი იყო შეხვედრაზე ეთქვა, რა მოხდა საქართველოში გასული დღეების განმავლობაში და „საით მიჰყავს ეს ქვეყანა „ქართულ ოცნებას“.

„ჩვენ ერთმანეთს მოსაზრებები გავუცვალეთ. ეს ვიზიტი არის იმისთვის, რომ ისინი ადგილზე გაეცნონ ვითარებას, ეს ყველაფერი შეაფასონ. თუმცა მგონია, რომ ყველაფერი იმდენად ცხადია, ნათელია, რომ ამას კამათი არ სჭირდება. როდესაც ყველა ნახულობს, როგორ სასიკვდილოდ ცემენ ადამიანებს ქუჩაში, როგორ აპატიმრებენ და არცერთი მოძალადე არ ისჯება, ეს თეთრზე შავით ნაწერია და ზედმეტი კომენტარი არ სჭირდება.

ამ შეხვედრაზე ნათლად ითქვა, რომ ამ შეხვედრის მიზანი და ამოცანა ვერ იქნება საერთოდ ვერანაირი/ვერაფრის ლეგიტიმაცია. ასევე, საუბარი იყო ადამიანის უფლებების დარღვევაზე, წამებაზე და იმ ძალადობაზე, რასაც თბილისის ქუჩებში ე.წ. ხელისუფლება ეწევა“, - განაცხადა ცუცქირიძემ.

გარდა ამისა, როგორც ცუცქირიძემ აღნიშნა, ძალადობა უნდა დასრულდეს და მოძალადეები უნდა დაისაჯონ.

„ხელისუფლებამ ბოთლიდან ამოუშვა ჯინი, რომელიც შესაძლოა, კიდევ უფრო სახიფათო გახდეს, მათ შორის მათთვის. ძალადობის, ზიზღის, სიძულვილის წახალისება, ეს არცერთ ხელისუფლებას არ ეპატიება და არ შეიძლება. ძალადობა უნდა დასრულდეს და მოძალადეები უნდა დაისაჯონ. ამასთან, საქართველო ნორმალური ცხოვრების რიტმში უნდა დაბრუნდეს, მაგრამ ეს ვერ მოხდება, თუ კი ძალადობა დარჩება დაუსჯელი“, - აღნიშნა ცუცქირიძემ.