ილჰამ ალიევი ყაზახეთში მომხდარ ავიაკატასტროფაში დაღუპულთა ოჯახებს თანაგრძნობას უცხადებს.

„ღრმა თანაგრძნობას ვუცხადებ ბაქო-გროზნოს მარშრუტით მფრინავ სამგზავრო თვითმფრინავის ჩამოვარდნის შედეგად დაღუპულთა ოჯახებს და დაშავებულებს სწრაფ გამოჯანმრთელებას ვუსურვებ“, - წერს აზერბაიჯანის პრეზიდენტი სოციალურ ქსელში.

ამასთან, აზერბაიჯანის პრეზიდენტის პრესსამსახურის ცნობით, ილჰამ ალიევი დსთ-ს ქვეყნების ლიდერების არაფორმალურ სამიტში მონაწილეობას აღარ მიიღებს.

„პრეზიდენტი ილჰამ ალიევი დსთ-ს ქვეყნების ლიდერების არაფორმალურ სამიტში მონაწილეობის მისაღებად რუსეთში მიფრინავდა, როდესაც ავიაკატასტროფის შესახებ ცნობები მიიღო. მან სასწრაფოდ უკან დაბრუნების ბრძანება გასცა. ავიაკატასტროფასთან დაკავშირებული საკითხები სახელმწიფოს მეთაურის პირადი კონტროლის ქვეშ არის“, - ნათქვამია აზერბაიჯანის პრეზიდენტის პრესსამსახურის განცხადებაში.

ბოლო მონაცემებით, ყაზახეთში „აზერბაიჯანის ავიახაზების“ თვითმფრინავის ჩამოვარდნის შემდეგ 28 ადამიანი გადარჩა.