ბოსნია და ჰერცეგოვინის უშიშროების მინისტრი ქრთამის აღების ბრალდებით დააკავეს, - ამის შესახებ ინფორმაციას სააგენტო Reuters-ი ბოსნია და ჰერცეგოვინის სახელმწიფო პროკურატურაზე დაყრდნობით ავრცელებს.

ბოსნია და ჰერცეგოვინის სახელმწიფო პროკურატურის ცნობით, უშიშროების მინისტრი, ნენად ნესიჩი და სხვა ექვსი პირი ორგანიზებული დანაშაულის, მათ შორის ფულის გათეთრების, სამსახურებრივი უფლებამოსილების გადამეტებისა და ქრთამის აღების ბრალდებით დააკავეს.

გავრცელებული ინფორმაციით, სახელმწიფო პროკურატურა და ბოსნიის სერბთა რესპუბლიკის შინაგან საქმეთა სამინისტრო კომპანიაში „სერბთა რესპუბლიკის გზები“ სავარაუდო კორუფციის ფაქტებს იძიებდა, სადაც 2016-2020 წლებში ნესიჩს გენერალური დირექტორის თანამდებობა ეკავა.

უშიშროების მინისტრთან, ნენად ნესიჩთან ერთად კომპანიის ამჟამინდელი დირექტორი, მილან დაკიჩიც დააკავეს.