რობერტ ფიცო ვოლოდიმირ ზელენსკის შეხვედრისკენ მოუწოდებს, - ამის შესახებ ინფორმაციას უკრაინული მედია სლოვაკეთის პრემიერ-მინისტრზე, რობერტ ფიცოზე დაყრდნობით ავრცელებს.

„მინდა მთელი ყურადღება გაზის ტრანზიტის შეჩერებასთან დაკავშირებული ვითარების მოგვარებაზე გავამახვილო. დაძაბულობის შემდგომი ესკალაციის განზრახვა არ მაქვს“, - წერს სლოვაკეთის პრემიერ-მინისტრი „ფეისბუქის“ საკუთარ გვერდზე.

რობერტ ფიცოს განცხადებით, უკრაინის პრეზიდენტს, ვოლოდიმირ ზელენსკის ღია წერილს უგზავნის, რომელშიც ნათქვამია, რომ უკრაინის გავლით გაზის ტრანზიტის შეჩერება სლოვაკეთს, თავად უკრაინასა და ევროკავშირს ზიანს აყენებს და ორმხრივ და მრავალმხრივ ურთიერთობებს ხელს არ უწყობს.

სლოვაკეთის პრემიერ-მინისტრი უკრაინის პრეზიდენტს შეხვედრას სლოვაკეთის ტერიტორიაზე, უკრაინის საზღვართან ახლოს სთავაზობს.

ცნობისთვის, ცოტა ხნის წინ სლოვაკეთის პრემიერ-მინისტრმა, რობერტ ფიცომ საპარლამენტო კომიტეტის სხდომაზე უკრაინა გააკრიტიკა და განაცხადა, რომ უკრაინის პრეზიდენტი, ვოლოდიმირ ზელენსკი ევროპაში „მათხოვრობს“ და „სხვებს აშანტაჟებს“. რობერტ ფიცოს განცხადებას მოგვიანებით უკრაინის პრეზიდენტი, ვოლოდიმირ ზელენსკი გამოეხმაურა და აღნიშნა, რომ მან რუსული გაზის მიწოდების შეწყვეტით გამოწვეული შედეგების შემსუბუქების მიზნით ფიცოს დახმარება შესთავაზა, თუმცა სლოვაკეთის პრემიერ-მინისტრმა შეთავაზებაზე უარი განაცხადა.