შვედეთის საგარეო საქმეთა მინისტრი - საქართველოში განვითარებული მოვლენები შემაშფოთებელია, მხარს ვუჭერთ იმ პირების წინააღმდეგ სანქციების დაწესებას, რომლებიც დემონსტრანტების წინააღმდეგ ძალადობაზე პასუხისმგებლები არიან

საქართველოში განვითარებული მოვლენები ძალიან შემაშფოთებელია, შვედეთი მხარს უჭერს იმ პირების წინააღმდეგ სანქციების დაწესებას, რომლებიც დემონსტრანტების წინააღმდეგ ძალადობაზე პასუხისმგებლები არიან, - ამის შესახებ შვედეთის საგარეო საქმეთა მინისტრმა, მარია მალმერ სტენერგარდმა ქვეყნის პარლამენტში (რიქსდაგი) საქართველოს შესახებ გამართული დებატების დროს განაცხადა.

„საქართველოში განვითარებული მოვლენები ძალიან შემაშფოთებელია. 2024 წელს რამდენიმე კანონი იქნა მიღებული, რომლებიც სამოქალაქო საზოგადოების საქმიანობასა და ადამიანის უფლებებითა და თავისუფლებებით სარგებლობას ზღუდავს. 2024 წლის 26 ოქტომბრის საპარლამენტო არჩევნებთან დაკავშირებით, დამკვირვებლებმა, მათ შორის ეუთო-ს დამკვირვებლებმა, დარღვებების შესახებ განაცხადეს. 2024 წლის 28 ნოემბერს „ქართულმა ოცნებამ“ გამოაცხადა, რომ პარტია ევროკავშირში გაწევრიანების შესახებ მოლაპარაკებების დაწყებას 2028 წლამდე არ აპირებს და ასევე, იმავე პერიოდში ევროკავშირის ყველა ფინანსურ მხარდაჭერაზე უარის თქმას აპირებს. აღნიშნულმა განცხადებამ საქართველოში მასშტაბური საპროტესტო აქციები გამოიწვია. რამდენიმე შემთხევაში, ჟურნალისტებისა და დემონსტრანტების წინააღმდეგ ძალის გადამეტებული გამოყენება მოხდა“, - განაცხადა შვედეთის საგარეო საქმეთა მინისტრმა.

მისი თქმით, მთელი ამ დროის განმავლობაში შვედეთი ევროკავშირს საქართველოში განვითარებული მოვლენების შესახებ თავისი პოზიციის მკაფიოდ გამოხატვისკენ მოუწოდებდა.

„შვედეთი ევროკავშირს მოუწოდებდა ამ მოვლენებთან დაკავშირებით თავისი წინააღმდეგობრივი პოზიცია მკაფიოდ გამოეხატა. საქართველოს საკითხი ბოლოს 16 დეკემბერს ბრიუსელში, საგარეო საქმეთა მინისტრების შეხვედრაზე იქნა განხილული. იქ ხაზგასმით აღვნიშნე, რომ შვედეთი მხარს უჭერს იმ პირების წინააღმდეგ სანქციების დაწესებას, რომლებიც დემონსტრანტების წინააღმდეგ ძალადობაზე პასუხისმგებლები არიან. ასევე, ხაზი გავუსვი საქართველოსთვის განკუთვნილი ევროკავშირის დაფინანსების გაყინული ფონდიდან საქართველოს სამოქალაქო საზოგადოებისთვის თანხების გადანაწილების მნიშვნელობას. ასევე, ევროკომისიის მიერ დიპლომატიური პასპორტების მფლობელებისთვის უვიზო მიმოსვლის შეჩერების შესაძლებლობის შესახებ დამატებითი ანალიზი მოვითხოვე, რადგან ეს მნიშვნელოვანი გზავნილი იქნება, რომ არ შეიძლება ევროკავშირთან მჭიდრო ურთიერთობების უპირატესობებით ისარგებლო, როცა აღებულ ვალდებულებებს არ იცავ. მივესალმები იმ ფაქტს, რომ კომისიამ ასეთი წინადადება წამოაყენა“, - აღნიშნა მარია მალმერ სტენერგარდმა.

პეტრას აუსტრევიჩუსი - გზა, რომელსაც „ქართული ოცნება“ ადგას, აბსოლუტურად რუსული, აღმოსავლური გზაა
ქართული პრესის მიმოხილვა 06.02.2025
გიორგი ანთაძე - მინიმალური დემოკრატიული სტანდარტებიც კი საფრთხეშია
კახა ოქრიაშვილი „ოცნებას“ - თქვენს კოლექტიურ შიზოფრენიას უნდა გადააყოლოთ ქვეყანა? - შემოდგომაზე არჩევნები გარდაუვალია!
GM PHARMA-ში ახალი მედიკამენტების კვლევა-განვითარება აქტიურად გრძელდება
თბილისის საერთაშორისო სტანდარტის ყინულის არენაზე, "ბაკურიანი 2025"-ის ფარგლებში, ყინულის ჰოკეიში მოასპარეზე გოგონათა გუნდების ოფიციალური ვარჯიში გაიმართა