საქართველოს პროევროპული ძალების მხარდაჭერას გავაგრძელებთ - ჩვენ რუსული გავლენის არსებობის შესახებ კარგად ვიცით, - ამის შესახებ შვედეთის საგარეო საქმეთა მინისტრმა, მარია მალმერ სტენერგარდმა ქვეყნის პარლამენტში (რიქსდაგი) საქართველოს შესახებ გამართული დებატების დროს განაცხადა.

„2024 წლის ოქტომბერში მთავრობამ შვედეთის საერთაშორისო განვითარების თანამშრომლობის სააგენტოს საქართველოს ხელისუფლებასთან დარჩენილი პირდაპირი თანამშრომლობის შეჩერება დაავალა. ნაცვლად ამისა, შვედეთმა 2024 წელს საქართველოს სამოქალაქო საზოგადოების მხარდაჭერა 25 მილიონი შვედური კრონით გაზარდა. ასევე, ნორდიკულმა-ბალტიისპირეთის ქვეყნების საგარეო საქმეთა მინისტრებმა ერთობლივი განცხადება გავავრცელეთ, რომელშიც ხელისუფლებას ეუთო-ს რეკომენდაციების შესრულებისკენ და აღნიშნული რეკომენდაციების საფუძველზე ახალი არჩევნების ჩატარების შესაძლებლობის განხილვისკენ მოვუწოდეთ“, - განაცხადა შვედეთის საგარეო საქმეთა მინისტრმა.

მისი თქმით, შვედეთი საქართველოში პროევროპული ძალების მხარდაჭერას გააგრძელებს.

„ჩვენ საქართველოში დემოკრატიული ძალების მხარდასაჭერად საუკეთესო გზების პოვნას მუდმივად ვცდილობთ. კარგად ვიცით რუსული გავლენის არსებობის შესახებ და ეს გასათვალისწინებელია. ამაზე ჩვენ მუდმივად ვმუშაობთ და საქართველოს პროევროპული ძალების მხარდაჭერას გავაგრძელებთ“, - აღნიშნა მარია მალმერ სტენერგარდმა.

შვედეთის საგარეო საქმეთა მინისტრმა საქართველოში შესაძლო ვიზიტების შესახებაც ისაუბრა.

„28 ნოემბერს „ქართული ოცნების“ მიერ გაკეთებული განცხადება, რომ საქართველო ევროკავშირში გაწევრიანების შესახებ მოლაპარაკებებს 2028 წლამდე არ დაიწყებს იმაზე მეტყველებს, რომ „ქართულ ოცნებას“ ევროკავშირის მიერ მოთხოვნილი ზომების განხორციელების ჭეშმარიტი სურვილი არ აქვს. რაც შეეხება საქართველოში შესაძლო ვიზიტებს, საჭიროა კარგად დაფიქრება იმის შესახებ, თუ როგორ განხორციელდეს მსგავსი ვიზიტები, „ქართული ოცნებისთვის“ ლეგიტიმაციის მინიჭების რისკის გამო“, - განაცხადა შვედეთის საგარეო საქმეთა მინისტრმა.