მამუკა მდინარაძე - იფიცებიან ვითომ კომპანიები - ხალხს იმხელა აგრესია აქვს მათ მიმართ, რომ მოსახლეობა ფანჯრებიდან კვერცხებს ესვრის ხალხს, რომლებიც სამწუხაროდ, სხვა ქვეყნებისა და ძალების სასარგებლო პროპაგანდაში და გაფიცვებში არიან ჩართულები

იფიცებიან ვითომ კომპანიები, რომელთა ხელმძღვანელები „ნაცმოძრაობას“ უჭერენ მხარს მაგრამ ამ კომპანიებშიც კი ისინი აღმოჩნდნენ სრულ უმცირესობაში,- ამის შესახებ „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა, მამუკა მდინარაძემ ჟურნალისტებთან განაცხადა, რითაც იმ ფაქტს გამოეხმაურა, რომ დღეს დამსაქმებლებისა და დასაქმებულების ნაწილი გაიფიცა, დოლიძის ქუჩაზე მყოფ აქციის მონაწილეებს კი საცხოვრებელი კორპუსიდან კვერცხებიც დაუშინეს.

როგორც მდინარაძემ აღნიშნა, ჩვეულებრივი მოსახლეობა ფანჯრებიდან კვერცხებს ესვრის იმ ხალხს, რომლებიც „სამწუხაროდ, სხვა ქვეყნების და სხვა ძალების სასარგებლო პროპაგანდაში და გაფიცვებში არიან ჩართულები“.

„დღევანდელი დღე იყო სრული ლუსტრაცია. იფიცებიან ვითომ კომპანიები, რომელთა ხელმძღვანელები „ნაცმოძრაობას“ უჭერენ მხარს მაგრამ ამ კომპანიებშიც კი ისინი აღმოჩნდნენ სრულ უმცირესობაში.

მეორე: როდესაც ერთი ორგან რაღაც ჩხუბები მოხდა საბურთალოს ტერიტორიაზე, „ტიტუშკებს“ ეძახიან. ახლა, მილიონ 120 ათას კაცს „ტიტუშკას“ თუ არ დაუძახებენ, ძალიან კარგს იზამენ.

„ტიტუშკები“ ხალხში შეერივნენ და ფანჯრებიდან კვერცხებს ესვრიან?! წარმოიდგინეთ, ხალხს რეალურად იმხელა აგრესია აქვს მათ მიმართ, რომ ჩვეულებრივი მოსახლეობა ფანჯრებიდან კვერცხებს ესვრის ამ ხალხს, რომლებიც სამწუხაროდ, სხვა ქვეყნების და სხვა ძალების სასარგებლო პროპაგანდაში და გაფიცვებში არიან ჩართულები“, - განაცხადა მამუკა მდინარაძემ.