პარტია „გახარია საქართველოსთვის“ წევრის ინფორმაციით, სასტუმრო „შერატონს“ გიორგი გახარიაზე თავდასხმის ამსახველი ვიდეოს ასლები აქვს, თუმცა, ის მოთხოვნის მიუხედავად გახარიასთვის არ გადაუციათ
გვაქვს ინფორმაცია, რომ მათ ამ კადრების ასლები აქვთ, რომელიც შეუძლიათ დღესვე გადმოგვცენ, - ამის შესახებ პარტია “გახარია საქართველოსთვის” წევრი ვიკა ფილფანი “ინტერპრესნიუსთან” საუბრისას აცხადებს, რომელიც თანაგუნდელებთან ერთად სასტუმრო “შერატონთან” საპროტესტო აქციას მართავს.
მისი თქმით, სასტუმრო “შერატონი” ბიძინა ივანიშვილის რეჟიმთან თანამშრომლობს.
„როგორც იცით მათ არ გადმოგვცეს კადრები, რისი მიღების უფლებაც გიორგი გახარიას ჰქონდა. გვაქვს ინფორმაცია, რომ მათ ამ კადრების ასლები აქვთ, რომელიც შეუძლიათ დღესვე გადმოგვცენ. რა თქმა უნდა ისინი ამას არ გვაძლევენ, რომლებიც პირდაპირ თანამშრომლობენ ძალადობრივ რეჟიმთან, რომელსაც ბიძინა ივანიშვილი მართავს. აქ (სასტუმროში) ყოფნა არცერთი ადამიანისთვის არ არის უსაფრთხო”,- აცხადებს ვიკა ფილფანი.
სასტუმრო „შერატონთან“ სამართალდამცავებიც იმყოფებიან.
აქციის მონაწილეები სტიკერების გაკვრას გეგმავენ.
