გრენლანდიის შესახებ მოლაპარაკებებს არ ვაწარმოებთ, - ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, კაია კალასმა განაცხადა.

„რა თქმა უნდა, ჩვენ მხარს ვუჭერთ ჩვენს წევრ სახელმწიფოს, დანიას და მის ავტონომიურ რეგიონს, გრენლანდიას“, - განაცხადა კაია კალასმა.

ევროკავშირს უმაღლესმა წარმომადგენელმა აღნიშნა, რომ ევროკავშირსა და აშშ-ს შორის კავშირები მჭიდროა, კერძოდ, ეკონომიკისა და უსაფრთხოების კუთხით.

შეგახსენებთ, აშშ-ის პრეზიდენტი, დონალდ ტრამპი აცხადებს, რომ კუნძულ გრენლანდიაზე კონტროლის მოპოვება აშშ-ის უსაფრთხოებისთვის მნიშვნელოვანია და ამ მიზნის მისაღწევად სამხედრო ძალის გამოყენებაც არ გამორიცხა. დანიისა და გრენლანდიის პრემიერ-მინისტრების განცხადებით, გრენლანდია არ იყიდება.

ამასთან, რამდენიმე დღის წინ Financial Times-მა აშშ-ის პრეზიდენტს, დონალდ ტრამპსა და დანიის პრემიერ-მინისტრს, მეტე ფრედერიქსენს შორის სატელეფონო საუბრის შესახებ ინფორმაცია გაავრცელა. გამოცემის ცნობით, სატელეფონო საუბარი „ძალიან ცუდად“ წარიმართა და დონალდ ტრამპმა დანიის პრემიერს განუცხადა, რომ გრენლანდიაზე კონტროლის მოპოვების შესახებ მისი განზრახვა სერიოზულია.