ძლიერმა თოვლმა პრობლემები გურიის რეგიონშიც შექმნა. როგორც ლანჩხუთის მუნიციპალიტეტის მერმა ალექსანდრე სარიშვილმა „ინტერპრესნიუსს“ განუცხადა, რამდენიმე ადგილიდან მოსახლეობის გაყვანა გახდა საჭირო. მისივე თქმით, მერიის ყველა სამსახური საგანგებო რეჟიმში მუშაობს, რათა არსებული პრობლემები დროულად აღმოიფხვრას.

„ჩვენს მუნიციპალიტეტში თოვლმა საკმაოდ სერიოზული პრობლემები შექმნა. ამ ეტაპზე მუშაობს 20 ერთეული ტექნიკა, მაგრამ გაწმენდილი გზა ხელახლა ხდება გასაწმენდი, რადგან ინტენსიურად თოვს. არის უბნები, სადაც ტექნიკა ამ დრომდე ვერაფრით მივიყვანეთ.

მუნიციპალიტეტის ყველა სამსახური ჩართულია, ადგილზე მობილიზებულია სამაშველო სამსახურის ბრიგადები. შემოგვივიდა ზარი, რომ რამდენიმე სახლი არის ჩამონგრეული, არის ადგილები საიდანაც მოსახლეობა გამოვიყვანეთ და ნაწილი გადავიყვანეთ სასტუმროში და ნაწილი ნათესავებთან. ელექტროენერგია არ მიეწოდება რამდენიმე სოფელს. „ენერგო პრო - ჯორჯიას“ ჯგუფები აქტიურად მუშაობენ ხუთშაბათამდე სასწავლო და სააღმზრდელო პროცესი შევაჩერეთ“, - განაცხადა ალექსანდრე სარიშვილმა.

ჩოხატაური მუნიციპალიტეტის მერის დავით შარაშენიძის ინფორმაციით კი, აქტიურად იწმინდება ცენტრალური გზები. მისივე თქმით, ორი დღით შეჩერდა სასწავლო და სააღმზრდელო პროცესი.

„თოვლის სახით მოსულმა უხვმა ნალექმა პრობლემები შექმნა. საკმაოდ დიდი თოვლია სოფლებში, ამ ეტაპზე პრიორიტეტად ჩავთვალეთ ცენტრალური გზები და იწმინდება აქტიურად. დღეს, სავარაუდოდ, დღის ბოლომდე ყველა სოფელში ცენტრალური გზის გაწმენდას უზრუნველვყოფთ და გადავალთ შიდა გზებზე. დიდთოვლობის გამო ჩოხატაურის მუნიციპალიტეტში ორი დღით შევაჩერეთ სასწავლო და სააღმზრდელო პროცესი“, - განუხადა „ინტერპრესნიუსს“ დავით შარაშენიძემ.