პოლიციამ ირაკლი კუპრაძე და კიდევ სამი პირი დააკავა
პოლიციამ „ლელო - ძლიერი საქართველოს“ გენერალური მდივანი ირაკლი კუპრაძე და კიდევ სამი წევრი: ოთარ ფარულავა, ბექა ბერიძიშვილი და ჯუბა ლოლაძე დააკავა.ისინი ვარაზისხევის მიმდებარე ტერიტორიაზე დააკავეს.
როგორც „ინტერპრესნიუსს“ ადვოკატმა არჩილ ჭავჭანიძემ განუცხადა, მისთვის ამ ეტაპზე დაკავების მიზეზები უცნობია. მისივე თქმით, ყოველგვარი განმარტების გარეშე მოხდა მათი დაკავება. როგორც ადვოკატი აცხადებს, მისთვის ამ ეტაპზე უცნობია სად გადაიყვანეს დაკავებულები.
დაკავებამდე, ირაკლი კუპრაძემ საკუთარ “ფეისბუქ” გვერდზე ლაივში განაცხადა, რომ ვარაზისხევთან პოლიციის 3 ავტომობილს ისინი ჩაკეტილი ჰყავდა, რომლებიც ავტომობილის დათვალიერებას ითხოვდნენ.
კუპრაძე პოლიციელებისგან დაინტერესდა რასთან დაკავშირებით ხდებოდა მათი შემოწმება, რაზეც ერთ-ერთმა პოლიციელმა უპასუხა: “გვაქვს უფლება, რომ გაგაჩეროთ, შეგამოწმოთ და საბუთები მოგთხოვოთ. კანონი გვაძლევს იმის უფლებას, რომ დაგათვალიეროთ როგორც თქვენ, ასევე ავტომობილიც”.
